ჟურნალისტებისთვის ახალი პროექტების გაცნობის მიზნით, ვეტერანების საქმეთა სახელმწიფო სამსახურმა მედია სემინარი ჩაატარა. პროექტი სახელწოდებით „საქართველო -ვეტერანებისთვის“ ფორტუნა ჰოლდინგისა და ვეტერანების საქმეთა სახელმწიფო სამსახურის უნიკალური წამოწყებაა.
პრეზენტაციები ფორტუნა ჰოლდინგის წარმომადგენლებმა ჰარპაზ ბოაზმა და ნირ ბარაკეტმა წარადგინეს. ამ ეტაპისთვის სამი პროექტის „ვეტერანთა კოოპერატიული სასოფლო-სამეურნეო თემის“, „ფასდაკლების სავაჭრო ქსელის“ და „ვეტერანთა ტაქსის სერვისის“ განხორციელება იგეგმება.
„ვეტერანების ტაქსის სერვისი პირველ რიგში ხელს შეუწყობს ვეტერანების დასაქმებას, შემცირდება გარემოს დაბინძურება. პროექტის ფარგლებში 3000-მდე ჰიბრიდული ტაქსის შემოყვანა იგეგმება. ხოლო ფასდაკლების პროექტის შედეგად ვეტერანებს არა მარტო 30%-იანი ფასდაკლება ექნებათ, არამედ მთლიანად ახალი სავაჭრო ქსელი შეისყიდის ქართულ პროდუქციას გლეხებისა და მწარმოებლებისგან და მოახდენს პროდუქტის რეალიზებას, ექსპორტს. ფასდაკლების ბარათი იმოქმედებს ჯანდაცვის სექტორში, დაზღვევის, განათლების სფეროებსა და აგრეთვე გართობის სფეროშიც“, - განაცხადა ირაკლი შიხიაშვილმა
შიხიაშვილის თქმით, პროექტის მთავარ მიზანს ქართველ ვეტერანთა ეკონომიკური მდგომარეობის გაუმჯობესება, საზოგადოებრივ ცხოვრებაში მათი აქტიური ჩართვა და ღირსეული ადგილის დამკვიდრება წარმოადგენს.
პრეზენტაციებს ასევე ესწრებოდნენ ვეტერანების საქმეთა სახელმწიფო სამსახურის საკონსულტაციო საბჭოს წევრები.