ქუთაისის მერიის თანამშრომლებს დრესკოდის დარღვევის შემთხვევაში სანქციები დაეკისრებათ. მათ "დახეული ჯინსებით, ღია ფერის სპორტული ფეხსაცმელით, ღრმა დეკოლტეთი და ზომაზე მოკლე ქვედაბოლოთი" სამსახურში მისვლა ეკრძალებათ, - ამის შესახებ მაესტროსთან საუბარში ქუთაისის მერიის ადმინისტრაციის სამსახურის უფროსი ზვიად ჯავახია აცხადებს.
"თანამშრომლის ჩაცმულობა სამსახურის გარეთ, რა თქმა უნდა, არ გაკონტროლდება. მისი ქცევის წესები და ნორმები, რა თქმა უნდა, გაკონტროლდება სამსახურის გარეთაც, რადგანაც მისი მოქმედებები არ უნდა იყოს რეპუტაციის შემლახველი" - აცხადებს ჯავახია.
მაესტროს ინფორმაციით, შესაბამისი ცვლილება ქუთაისის მერიის შინაგანაწესში ახლა შევიდა, თუმცა მერიის ადმინისტრაციის სამსახურის უფროსი ზვიად ჯავახია ნეტგაზეთთან საუბარში აცხადებს, რომ ასეთი წესი მათთან ადრეც არსებობდა და ახლა თანამშრომლებს კიდევ ერთხელ შეახსენეს.
მისივე თქმით, დრესკოდის რეგულარულად დარღვევის შემთხვევაში შესაძლოა მკაცრი სანქციაც იქნეს გამოყენებული.
“სნქცია იქნება უბრალოდ გაფრთხილება, რომ აღარ ჩაიცვა. თუ კიდევ ჩაიცვამს, მაშინ დაარღვევენ შინაგანწესს, რასაც ალბათ სიტყვიერი გაფრთხილება მოჰყვება, სამსახურიდან მაგის გამო არ დაითხოვენ. თუმცა, თუ დარღვევას]რეგულარული ხასიათი ექნება, შეიძლება მკაცრი ზომების მიიღებაც”, - აცხადებს ჯავახია.
