2015 წლის 8 ოქტომბერს საქართველოს პარლამენტის ვეცე-სპიკერი ზვიად ძიძიგური გერმანიის ბუნდესთაგის დელეგაციას შეხვდება. დელეგაცია, რომელსაც გერმანიის ბუნდესთაგის წევრი, პროფესორი მათიას ციმერი (CDU/CSU) ხელმძღვანელობს, 7-9 ოქტომბერს იქნება თბილისში. ვიზიტის მიზანს წარმოადგენს გერმანიის ბუნდესთაგის „საერთაშორისო საპარლამენტო სტიპენდიის” (IPS) პროგრამაში მონაწილეთა შერჩევა.

აღნიშნული სტიპენდიის ფარგლებში, მსოფლიოს 41 ქვეყნიდან 120 სტიპენდიატს 2016 წლის პირველი მარტიდან 31 ივლისამდე შესაძლებლობა ექნება, გერმანიის ბუნდესთაგის მიერ სრულად დაფინანსებული სტიპენდიის ფარგლებში გაეცნოს გერმანიის საპარლამენტო სისტემას გერმანიის ბუნდესთაგში. პროგრამის მიზანია, სტიპენდიატებისათვის თვალსაჩინო გახადოს პოლიტიკური ცხოვრება და დემოკრატიული გადაწყვეტილებების მიღების პროცესი. სტიპენდიატები სამი თვის განმავლობაში იმუშავებენ ბუნდესთაგის ერთ-ერთი დეპუტატის ბიუროში და პარალელურად შეძლებენ ბერლინის ერთ-ერთ უნივერსიტეტში ლექციებზე დასწრებას.

პროგრამას პატრონაჟს უწევს გერმანიის პარლამენტის თავმჯდომარე და იგი ხორციელდება ბერლინის სამ უნივერსიტეტთან ერთად. გერმანიის ბუნდესთაგი გაიღებს მგზავრობის, ბინის,  დაზღვევისა და ყოველთვიური სტიპენდიის ხარჯებს.

ყოველი წლის დეკემბრიდან გერმანიის საელჩოში შესაძლებელია ინფორმაციის მიღება IPS-ის საგანაცხადო საბუთების შესახებ. დაწვრილებითი ინფორმაციის ხილვა პროგრამასთან დაკავშირებით შეგიძლიათ შემდეგ ვებ-გვერდზე: http://www.bundestag.de/ips

ვიზიტის ფარგლებში დელეგაცია თბილისში შეხვდება პოლიტიკის, ეკონომიკისა და განათლების სფეროს წარმომადგენლებს. ასევე დაგეგმილია შეხვედრა პროგრამის ყოფილ სტიპენდიატებთან არსებული კონტაქტების შენარჩუნების მიზნით. საქართველოში IPS-ის ყოფილი სტიპენდიატები გაერთიანდნენ კავშირში, რომლის მიზანია სხვა სტიპენდიატებთან ერთად კულტურათა შორის დიალოგის შენარჩუნება და საერთაშორისო ქსელის შექმნა.