თბილისის მერმა დავით ნარმანიამ დედაქალაქის ბრენდული სუვენირის კონკურსში გამარჯვებულები დააჯილდოვა.
დედაქალაქის მერიის ინფორმაციით, საკონკურსო კომისიის გადაწყვეტილებით დედაქალაქის ბრენდული სუვენირის სტატუსი სამმა ნამუშევარმა მიიღო. საუკეთესო ნამუშევრებს შორის დასახელდა: ვიტრაჟული მინის ვაზა - ავტორი მაია სამჭკუაშვილი; ხეზე ამოტვიფრული ძველი თბილისის ხედი - ავტორი მაია უდუმაშვილი და დეკორატიული საკიდი, მედალიონი - ავტორი თამარ მჟავანაძე.
დავით ნარმანიამ გამარჯვებულ ავტორებს მიულოცა და სერტიფიკატები გადასცა.
"თავისი შინაარსით და დატვირთვით ძალიან საინტერესო კონკურსი იყო, რომელიც იმისთვის გამოვაცხადეთ რომ თბილისთან, მის ისტორიასთან, კულტურულ მემკვიდრეობასთან ასოცირებული სუვენირი გვქონოდა. დედაქალაქში ჩამოსულ ტურისტებს, ვიზიტორებს საშუალება ექნებათ ჰქონდეთ თბილისის სამახსოვრო სუვენირი. აღსანიშნავია, რომ კონკურსი საჯარო იყო და მასში მონაწილეობა ნებისმიერ მსურველს შეეძლო",- განაცხადა დავით ნარმანიამ.
დედაქალაქის ბრენდული სუვენირის შესარჩევი კონკურსი თბილისის მერიამ მიმდინარე წლის გაზაფხულზე გამოაცხადა. საკონკურსო პირობების მიხედვით თბილისის ბრენდული სუვენირი დედაქალაქის ისტორიული, კულტურული, ტრადიციული ღირებულებების შესაბამისი, ადვილად აღსაქმელი, დასამახსოვრებელი და ორიგინალური უნდა ყოფილიყო. კონკურსში მონაწილეობის მიღება ნებისმიერ ფიზიკურ და იურიდიულ პირს შეეძლო. კონკურსზე სულ 88 ნამუშევარი იყო წარმოდგენილი. საუკეთესო ნამუშევარი სხვადასხვა სტრუქტურებიდან მოწვეულმა, დარგის სპეციალისტებით დაკომპლექტებულმა საკონკურსო კომისიამ გამოავლინა. კომისიას თბილისის მერის მოადგილე გიორგი ხელაია ხელმძღვანელობდა. თითოეული ნამუშევრის შეფასება სპეციალური, ქულათა სისტემის შესაბამისად განხორციელდა. თბილისის ბრენდული სუვენირის კონკურსისთვის გათვალისწინებული საპრიზო თანხა, 5 000 ლარი გამარჯვებულ ავტორებს შორის თანაბრად გადანაწილდა.
