ტოლერანტობის სკულპტურის ესკიზის შესაქმნელად კონკურსი გამოცხადდა. ამასთან დაკავშირებით დღეს, მთავრობის ადმინისტრაციაში, რელიგიის საკითხთა სახელმწიფო სააგენტოს თავმჯდომარე, ზაზა ვაშაყმაძე სხვადასხვა რელიგიური კონფესიების წარმომადგენლებს შეხვდა.
მისი განმარტებით, გასული წლის 16 ნოემბერს საქართველოს პრემიერ-მინისტრი, ირაკლი ღარიბაშვილი გამოვიდა ინიციატივით, რომ ღვინის აღმართსა და მეტეხის აღმართს შორის არსებულ სკვერს ტოლერანტობის სკვერი დაერქვას. ამასთან დაკავშირებით იმსჯელა საკრებულომ და მიიღო შესაბამისი გადაწყვეტილება. ამდენად, რელიგიის კონფესიების წარმომადგენელთა ჩართულობით შეიქმნება სამუშაო ჯგუფი. ასევე იმუშავებს სარეკომენდაციო ექსპერტთა ჯგუფი, რათა აღნიშნული სკულპტურის შესაქმნელად კონკურსი ჩატარდეს და საუკეთესო ესკიზი შეირჩეს.
ზაზა ვაშაყმაძის განცხადებით, ეს შემდგომი ერთი თვის განმავლობაში მოხდება საუკეთესო ესკიზების წარდგენა 28 ოქტომბრამდე მოხდება. გამარჯვებულ ავტორს ფულადი ჯილდო 5 000 ლარი გადაეცემა. ზაზა ვაშაყმაძემ ასევე დასძინა, რომ გამარჯვებული ესკიზის გამოვლენა და დასახელება წელს, 16 ნოემბერს ტოლერანტობის სკვერში მოხდება. მან მოუწოდა ხელოვანებს, დაინტერსებულ პირებს მიიღონ მონაწილეობა კონკურსში, რადგან მრავალფეროვნება ამ კონკურსის წარმატებით ჩასატარებლად უმჯობესია.
შეხვედრაში მონაწილეობდნენ საპატრიარქოს, მუსლიმური თემის, ებრაული თემის, სომხური ეკლესიის, იეზიდების, კათოლიკების, ბაბტისტების წარმომადგენლები, რომელთაც ტოლერანტობის სკულპტურის ესკიზის შექმნასთან დაკავშირებით იდეა მოიწონეს.