გენერალური აუდიტორი ლაშა თორდია არასამთავრობო სექტორს მოუწოდებს აუდიტის პროცესში ჩართვისკენ. შეხვედრა არასამთავრობო სექტორსა და გენერალურ აუდიტორს შორის დღეს გაიმართა.
ლაშა თორდიამ ჟურნალისტებთან განაცხადა, რომ არასამთავრობო სექტორმა უნდა იცოდეს რა პროცესები მიმდინარეობს აუდიტის სამსახურში. გარდა ამისა თორდია მიიჩნევს, რომ ისინი რეკომენდაციების შესრულებაშიც დაეხმარებიან.
"რეკომენდაციების შესრულებასთან დაკავშირებითაც დაგვეხმარებიან არასამთავრობო სექტორის წარმომადგენლები იმისთვის, რათა გარკვეული წნეხი და ზეწოლა მოვახდინოთ იმ უწყებებზე, რომლებიც ურჩად არ ასრულებენ ჩვენს რეკომენდაციებს", - განაცხადა თორდიამ.
მან ხაზგასმით აღნიშნა, რომ სახელმწიფო აუდიტის მიზანი ვინმეს დაჭერა არ არის.
,,სწორედ ამისთვის ვაძლევთ რეკომენდაციას, რომ გამოსწორდეს ესა თუ ის სისტემური ხარვეზი. შესაბამისად, ჩვენთვის მნიშვნელოვანია ზუსტად ამაზე მოხდეს ყურადღების მიქცევა იმ უწყებების მხრიდან, რომლებიც არიან ჩვენი შემოწმების ობიექტები, რათა სამომავალოდ არავინ იყოს დასაჭერი, ან პასუხისგებაში მისაცემი", - განაცხადა თორდიამ და დასძინა, რომ ერთ-ერთი ბერკეტი, რომლითაც აუდიტის სამსახური ახდენს ზემოქმედებას აღმსარულებელ ხელისუფლებაზე არის მედია და ასევე, არასამთავრობო სექტორი.
