საზოგადოებრივი მაუწყებლის გაერთიანებული არქივის სამსახური, მის ფონდებში დაცული მასალის ფართო აუდიტორიისთვის გაცნობის პროცესს იწყებს. უპირველეს ყოვლისა, ეს შეეხება იმ ადამიანებს, რომლებსაც არ ჰქონდათ საშუალება ენახათ ან მოესმინათ ეს მასალები ან უშუალოდ ის ღონისძიებები, რომელთა ჩანაწერებიც არქივებშია დაცული, მაუწყებელი იწყებს ახალი პროექტის განხორციელებას, რომლის ფარგლებშიც დაგეგმილია შეზღუდული შესაძლებლობების მქონე პირებისთვის, კერძოდ კი სმენადაქვეითებული ადამიანებისთვის საფონდო უნიკალური სპექტაკლების ადაპტაცია. მსოფლიოში აღიარებული რეჟისორების რობერტ სტურუას, თემურ ჩხეიძის, მიხეილ თუმანიშვილის და სხვათა სპექტაკლების სუბტიტრირება ან სურდოთარჯიმნით მათი აღჭურვა. ეს შესაძლებლობას მისცემს შეზღუდული შესაძლებლობების ადამიანებს გაეცნონ იმ ჩანაწერებს, რომლის ხილვის და სრულყოფილი აღქმის შესაძლებლობა მათ აქამდე არ ჰქონდათ.
დაგეგმილია ამ ნიმუშების ჩვენება შესაბამის დარბაზებში, სადაც სპექტაკლების ჩვენებასთან ერთად, მაყურებელი შეხვდება ამ სპექტაკლების შემქმნელ შემოქმედებით კოლექტივებს და გაესაუბრება მათ სპექტაკლის დაწყებამდე და მისი დასრულების შემდეგ.
აღნიშნული ღონისძიებების მიმდინარეობის შესახებ ანონსს და დეტალურ ინფორმაციას საზოგადოებრივი მაუწყებელი პერმანენტულად გაავრცელებს.