ენერგეტიკის სამინისტრო ეხმიანება ერთ-ერთი საინფორმაციო სააგენტოს მიერ გავცრელებულ ინფორმაციას დენის გაიაფებასთან დაკავშირებით, რომელშიც ნათქვამია, რომ ენერგეტიკის მინისტრი რამდენიმე დღეში დაგეგმილ ბრიფინგზე მოსახლეობას ელექტროენერგიის გაიაფებული ტარიფის შესახებ ამცნობს.
ენერგეტიკის სამინისტროს განცხადებით, კახა კალაძემ კომენტარი ტარიფების კლებასთან დაკავშირებით 3 წლის წინ, 2012 წელს გააკეთა, საინფორმაციო სააგენტოებმა კი არქივიდან ამოღებული განცხადება არასწორი თარიღით (27.09.2015) გამოაქვეყნეს.
„საქართველოს ენერგეტიკის სამინისტროს საზოგადოებასთან ურთიერთობის დეპარტამენტი თხოვნით მიმართავს მედიასაშუალებებს და საინფორმაციო სააგენტოებს ნუ შეუწყობენ გადაუმოწმებელი, შეთხზული ინფორმაციების გავრცელებას და მოსახლეობის შეცდომაში შეყვანას ხელს. რამდენიმე დღეა, გაურკვეველი საიტებით, ვრცელდება სამი წლის წინანდელი განცხადება ტარიფების კლებასთან დაკავშირებით , რომელიც ვიცე-პრემიერმა/ენერგეტიკის მინისტრმა კახა კალაძემ გააკეთა 2012 წელს. მოვუწოდებთ ყველას არქივიდან ამოღებული ინფორმაციები გავრცელდეს სათანადო ფორმით - მითითებული იყოს რიცხვი და განახლების (ციტირების) საბაბი. აგრეთვე, კიდევ ერთხელ, შეგახსენებთ, საქართველოს ენერგეტიკის სამინისტრო ღიაა ყველა მედია საშუალებასთან თანამშრომლობისათვის და ნებისმიერი ინფორმაციის მიღება ან გადამოწმება შესაძლებელია საზოგადოებასთან ურთიერთობის დეპარტამენტში." - ნათქვამია განცხადებაში.