საკრებულოს ფრაქცია „ გაერთიანებული დემოკრატიული მოძრაობის“ წევრი შალვა ოგბაიძე დედაქალაში საცობების არსებობასთან დაკავშირებით, თბილისის მერის მოადგილის ირაკლი ლექვინაძის გუშინ მედიაში გავრცელებულ შეფასებებს ეხმაურება .
ოგბაიძის განცხადებით, ლექვინაძის მიერ დასახელებული საცობების 3 მთავარი მიზეზი არასრული სიმართლეა და ის მხოლოდ ობიექტურ მიზეზებს ეხება.
„არსებობს საცობების წარმოშობის ობიექტური და სუბიექტური მიზეზები, მათ შორის სუბიექტური მიზეზია, რომ თბილისში ამ სფეროს მენეჯმენტი საერთოდ არ არსებობს. დედაქალაქის მერიას არ აქვს სამსახური, რომელიც თავიდან ბოლომდე თავის ხელში აიღებდა მოძრაობის ორგანიზაციისა და სატრანსპორტო სისტემების მართვას, მათ შორის-საცობებთან ბრძოლასაც. მაგალითად, საუბარია სამარშრუტო ტაქსების და ყვითელი ავტობუსების მარშრუტების გადასინჯვაზე, ტაქსების სფეროში არსებულ განუკითხაობაზე, საზოგადოებრივი ტრანსპორტის მოუწესრიგებლობაზე, რაც მის არაპოპულარობას განაპირობებს, საუბარია საგზაო ნიშნებისა და შუქნიშნების გაუმართაობაზე, საცობების ერთ ერთ მთავარ მიზეზზე -„სითი-პარკზე“, ქალაქის ცენტრში მიმდინარე მეგა-მშენებლობლობებზე, რომელიც ავტომატურად გახდება სატრანსპორტო კოლაფსის ერთ-ერთი მთავარი მიზეზი, არ ხდება საწვავისა ხარისხის და ჰაერის დაბინძურების დონის კონტროლი და ა. შ. ეს არის საცობების არსებობის რეალური მიზეზები და არა ხიდებისა თუ გზების მშენებლობა. ევრობის ქალაქებშიც ხდება ქუჩების რეაბილიტაცია, მაგრამ სწორი მენეჯმენტის პირობებში ეს საცობების გამომწვევი მთავარი მიზეზი არაა.- “ განაცხადა ოგბაიძემ.
