საქართველოს პარლამენტში, დღეს, მიგრაციის საკითხებზე სამუშაო შეხვედრა - „მიგრაციული პროცესები საქართველოში: პრობლემები, გამოწვევები, შესაძლებლობები“ მიმდინარეობს.
საქართველოს საგარეო საქმეთა ყოფილმა მინისტრმა, სალომე ზურაბიშვილმა დამსწრეთ მოხსენება - „საქართველო-მიგრაციის გამოწვევა და მოქალაქეობის საკითხი“ წარუდგინა და იმ პრობლემების შესახებ ისაუბრა, რასაც საზღვარგარეთ მცხოვრები ქართველები აწყდებიან. მისივე თქმით, დიასპორა საზღვარგარეთ საკუთარი ქვეყნის ელჩს წარმოადგენს და ამიტომ მას სახელმწიფოს მხრიდან განსაკუთრებული ყურადღება და მზრუნველობა სჭირდება. სალომე ზურაბიშვილმა კონფლიქტურ რეგიონებში მიმდინარე პასპორტიზაციის პროცესზეც ისაუბრა და აღნიშნა, რომ ეს სახელმწიფოსთვის ერთ-ერთი ყველაზე დიდი გამოწვევაა. მისივე განცხადებით, სხვა ქვეყნის მოქალაქეობის მიღების მიუხედავად, პირს საქართველოს მოქალაქეობა უნდა უნარჩუნდებოდეს.
სახელმწიფო სერვისების განვითარების სააგენტოს მოქალაქეობისა და მიგრაციის სამსახურის უფროსმა, სოსო გიორგაძემ ორმაგი მოქალაქეობის საკანონმდებლო ბაზისა და საქმისწარმოების პროცესის შესახებ ისაუბრა და ის მიზეზები განმარტა, რომელთა არსებობის შემთხვევაშიც პირს საქართველოს მოქალაქეობა შეიძლება შეუწყდეს. მომხსენებელმა მოქალაქეობის შეწყვეტა-მინიჭების სტატისტიკაც წარმოადგინა. გერმანიაში ქართული დიასპორის წარმომადგენელმა, შალვა ძებისაშვილმა კი მიგრაციული პროცესების კონტექსტში, ისრაელის, ირლანდიისა და პოლონეთის გამოცდილებაზე ისაუბრა.
სამუშაო შეხვედრის მონაწილეებს საქართველოს მოქალაქეობასთან დაკავშირებული საკითხებისა და მიგრანტთა უფლებების შესახებ სახალხო დამცველის ხედვა გააცნო სახალხო დამცველის მოადგილემ, ნათია კაციტაძემ. მისი შეფასებით, უცხოეთში მყოფ თანამემამულეებთან განსაკუთრებული მიდგომაა საჭირო. მიგრაციის საერთაშორისო ორგანიზაციის წარმომადგენელმა, ნათია კვიციანმა კი მიგრაციის ეკონომიკურ ასპექტებზე ისაუბრა და აღნიშნა, რომ სასურველია, სახელმწიფომ უცხოეთში მყოფი თანამემამულეების ადამიანური და ფინანსური რესურსი ეკონომიკის განვითარებისთვის გამოიყენოს. საბერძნეთში ქართული ემიგრაციის შესახებ ისაუბრა დიასპორის საკითხებში სახელმწიფო მინისტრის პირველმა მოადგილემ, ზაალ სარაჯიშვილმა.
სამუშაო შეხვედრის შინაარსისა და მიზნის შესახებ განმარტება საქართველოს პარლამენტის თავმჯდომარემ, დავით უსუფაშვილმა, მედიასთან საუბრისას გააკეთა.
„საქართველოსთვის, რომელიც მოსახლეობით მცირე ქვეყანათა რიცხვს მიეკუთვნება, განსაკუთრებით მნიშვნელოვანია ჩვენი მოქალაქეების ბედი, რომლებიც ქვეყნიდან გადიან, სხვა ქვეყნებში ცხოვრობენ, შემდგომ ბრუნდებიან, ან ზოგჯერ აღარ ბრუნდებიან მალე. ამასობაში, საქართველოს კონსტიტუციაში წერია, რომ სახელმწიფო მფარველობს თავის მოქალაქეს მიუხედავად მისი ადგილსამყოფელისა, ამიტომ ჩვენ გვაქვს ძალიან ბევრი თემები, იმის თაობაზე, თუ როგორ უნდა გაუმჯობესდეს ურთიერთობა სახელმწიფოსა და საქართველოს მოქალაქეებს შორის იმ შემთხვევაში, როდესაც მოქალაქეები ტოვებენ საკუთარ ქვეყანას. ამასობაში, ჩვენ გლობალიზაციის ეპოქაში არ და ვერ შევუშლით ხელს იმას, რომ საქართველოს მოქალაქეები თავისუფლად გადაადგილდებოდნენ, მაგრამ გვაქვს ინტერესი იმისა, რომ საქართველოს მოსახლეობა არ მცირდებოდეს“, - განაცხადა დავით უსუფაშვილმა.
მიგრაციის თემაზე ორგანიზებულ სამუშაო შეხვედრაში მონაწილეობენ პარლამენტის პროფილური კომიტეტების, შესაბამისი სამინისტროების და სახელმწიფო უწყებების, საპარლამენტო პოლიტიკური ჯგუფების, საქართველოს საპატრიარქოს, ქართული ემიგრაციის, აკადემიური და არასამთავრობო წრეების წარმომადგენლები.
