23 სექტემბერს, თამარაშვილის ქუჩაზე მდებარე ვისოლის ავტოგასამართი სადგურიდან „წიგნი ყველა სოფელს“ პროექტის ფარგლებში „მოსიარულე ბიბლიოთეკამ“ ქალაქის აქცია დაიწყო, რომელიც თბილისის სხვადასხვა უბნის მოსახლეობას საშუალებას მისცემს კიდევ მეტად აქტიურად ჩაერთონ წიგნების შეგროვების პროცესში. „მოსიარულე ბიბლიოთეკა“ პირველად გლდანს ეწვევა და ნებისმიერი მოსახლისგან მიიღებს წიგნებს, რომლებიც შემდგომში სოფლების ბიბლიოთეკებს გადაეცემა. ამავე დღეს თამარაშვილის ქუჩაზე მდებარე ვისოლის ავტოგასამართ სადგურზე მისული ყოველი მომხმარებლის სახელზე „ვისოლი“ 1 ლარს გაიღებს ახალი წიგნების შესაძენად მათთვის, ვისთვისაც ის ხელმიუწვდომელია.
„წიგნი ყველა სოფელს“ - არასამთავრობო, სახელმწიფო, საქართველოს საპატრიარქოს, ბიზნეს სექტორის ერთიანი ძალისხმევით და ორგანიზაცია „სტუდენტური ერთიანობისა“ და ახალგაზრდული მოძრაობა დავითიანნის ორგანიზებით ხორციელდება. პროექტი სპორტისა და ახალგაზრდობის სამინისტროს სსიპ ბავშვთა და ახალგაზრდობის განვითარების ფონდის საგრანტო კონკურსის გამარჯვებულია და „ვისოლ ჯგუფის“, საქართველოს ეროვნული ბიბლიოთეკის, „პალიტრა L“-ის, ბაკურ სულაკაურის გამომცემლობის, ასევე ქველმოქმედი საზოგადოების მხარდაჭერით მიმდინარეობს.
პროექტის ფარგლებში წიგნების შეგროვება მთელი თბილისის მასშტაბით ხორციელდება. სპეციალური ყუთები განთავსებულია „ვისოლის“ ავტოგასამართ სადგურებზე, სუპერმარკეტების ქსელ „სმარტის“, ამერიკული რესტორნების ქსელ „ვენდის“, და “დანქინ დონატსის” რესტორნებში. ასევე, ყუთები განთავსებულია შემდეგ ტაძრებში: წმინდა სამების საკათედრო ტაძარი, ქაშვეთის წმინდა გიორგის სახელობის ტაძარი, დიდუბის ღვთისმშობლის სახელობის ტაძარი.
იმის გათვალისწინებით, რომ ქალაქის მოსახლეობის ნაწილი სხვადასხვა მიზეზის გამო ვერ ახერხებს წიგნების ობიექტებზე დატოვებას, მოხდება ქალაქ თბილისის მუნიციპალიტეტის რაიონული ერთეულების შემოვლა ავტობუსით - „მოსიარულე ბიბლიოთეკით“, რათა მოსახლებას სახლთან ახლოს შეეძლოს წიგნების პროექტისთვის გადაცემა. ერთი კვირის განმავლობაში მოსიარულე ბიბლიოთეკა თბილისის მასშტაბით გადაადგილდება და ნებისმიერი რაოდენობის წიგნს მიიღებს მსურველებისგან. ქალაქის აქცია ხელს შეუწყობს მოსახლეობის კიდევ უფრო მეტად ინფორმირებას და ჩართვას წიგნის და წიგნიერების პოპულარიზაციის საკითხში.
„წიგნი ყველა სოფელს“ გრძელვადიანი პროექტია და მაღალმთიანი სოფლების მწირი სასკოლო ბიბლიოთეკების წიგნის ფონდის გამდიდრებას ისახავს მიზნად. მოსახლეობის აქტიურობიდან გამომდინარე ,პროექტი სხვა რეგიონების ბიბლიოთეკებსაც მოამარაგებს და მომავალშიც გაგრძელდება.
