მერის მოადგილე ირაკლი ლექვინაძე თბილისისა და ათენის მერიების ერთობლივი პროექტის შემაჯამებელ ღონისძიებას დაესწრო. პროექტის ფარგლებში, ათენის მერიის საერთაშორისო ბანაკში 32 ქართველი ახალგაზრდა გაემგზავრა.
მერიის ინფორმაციით, ბანაკის მონაწილეები 13 ივნისის სტიქიის შედეგად დაზარალებული და მრავალშვილიანი ოჯახებიდან შეარჩიეს. მათ შორის იყვნენ სოციალურად დაუცველი ბავშვებიც საქართველოს სხვადასხვა რეგიონიდან. პროექტის შემაჯამებელ ღონისძიებაზე დოკუმენტური ფილმის პრეზენტაცია გაიმართა, სახელწოდებით - „ქართველი ბავშვების მოგზაურობა საბერძნეთში და დასვენება ათენის მერიის საერთაშორისო ბანაკში“.
„მე ვფიქრობ, მსგავსი სახის ღონისძიებები ახალგაზრდებისთვის, განსაკუთრებით, საინტერესოა, სწორედ ამიტომ, თბილისის მერიამ პროექტის განხორციელებას მხარი დაუჭირა დაქართველი ბავშვების ათენში ტრანსპორტირება უზრუნველყო. პროექტის მონაწილეებს საშუალება ჰქონათ გაცნობოდნენ უცხო ქვეყნის კულტურას, ამასთან, ღირსეულად წარმოეჩინათ საკუთარი ქვეყანა საერთაშორისო ბანაკში“. - განაცხადა მერის მოადგილე ირაკლი ლექვინაძემ.
ქალაქ თბილისის მერიის თანადაფინანსებით განხორციელებული პროექტის ფარგლებში, ქართველმა ბავშვებმა ქალაქ ათენისა და ქალაქ სალონიკის ღირსშესანიშნაობები დაათვალიერეს. ასევე, მონაწილეობა მიიღეს საერთაშორისო ბანაკის სპორტულ და კულტურულ ღონისძიებებში.
„ათენის მერიის საერთაშორისო ბანაკში ორი კვირით გავემგზავრეთ. შევიძინეთ ძალიან ბევრი მეგობარი, ასევე, მოგვეცა საშუალება, დაგვეთვალიერებინა ათენის ღირსშესანიშნაობები, რისთვისაც ძალიან დიდი მადლობა გვინდა გადავუხადოთ დედაქალაქის მერიას. “ - აღნიშნა ბანაკის მონაწილე ნინი ჩარკვიანმა.
მერის მოადგილის, ირაკლი ლექვინაძის განცხადებით, შესაძლოა, მომავალ წელს, მერიის განათლების, სპორტისა და ახალგაზრდულ საქმეთა საქალაქო სამსახურის მიერ ორგანიზებულ ბანაკში მონაწილეობა ბერძენმა ბავშვებმაც მიიღონ.