აღმოსავლეთ პარტნიორობის საერთაშორისო ახალგაზრდული ბანაკი დასრულდა. დახურვის ცერემონიას ესწრებოდა, ევროპულ და ევროატლანტიკურ სტრუქტურებში ინტეგრაციის სახელმწიფო მინისტრი დავით ბაქრაძე. იგი მიესალმა მონაწილეებს, ესაუბრა მათ ქართველი ხალხის მისწრაფებებსა და ახალგაზრდების როლის შესახებ, ოფიციალური ცერემონიის დასასრულს კი სერტიფიკატები გადასცა ბანაკის მონაწილეებს.
,,ბანაკის დახურვის არაოფიციალური ნაწილი მრავალფეროვანი ემოციების ფონზე მიმდინარეობდა, საღამოს მუსიკალურად აფორმებდა ქართული ბენდი „ნიუტონი“, რომელმაც კიდევ უფრო გაამძაფრა მონაწილეების მაღალი განწყობა და პოზიტივი. ბანაკმა მნიშვნელოვანი როლი ითამაშა აღმოსავლეთ პარტნიორობის 6 ქვეყნის ახალგაზრდებს შორის ცოდნის, გამოცდილების გაზიარების, ურთიერთობების გაღრმავების, კომუნიკაციის გამყარებისა და შემდგომი ურთიერთთანამშრომლობის გზების დასახვის პროცესებში” - აცხადებენ თბილისის მერიაში.
აღმოსავლეთ პარტნიორობის საერთაშორისო ახალგაზრდული ბანაკი ყვარელში, იუსტიციის სასწავლო ცენტრში თბილისის ევროპული ახალგაზრდული ცენტრის ინიციატივით, თბილისის მუნიციპალიტეტის მერიის და აღმოსავლეთ პარტნიორობის ფორუმის საქართველოს ეროვნული ფორუმის მხარდაჭერით ჩატარდა.