თბილისის მერმა დავით ნარმანიამ, ლუბლიანის მერთან ზორან იანკოვიჩთან ერთად , თბილისსა და ლუბლიანას შორის დაძმობილების ხელშეკრულების განახლებას მოაწერა ხელი.
დედაქალაქის მერიის ინფორმაციით, ხელშეკრულება საზოგადოებრივი ცხოვრების სხვადასხვა დარგში თანამშრომლობას ითვალისწინებს. კერძოდ მხარეები გაცვლიან წარმომადგენლობით დელეგაციებს, ასევე ინფორმაციას ქალაქების საზოგადოებრივი ცხოვრების, ადგილობრივი ორგანოთა მუშაობის შესახებ, ითანამშრომლებენ საერთაშორისო ორგანიზაციებთან ერთობლივი პროექტებისა და ინიციატივების განხორციელების მიზნით და ხელს შეუწყობენ საინვესტიციო საქმიანობის განვითარებას.
დოკუმენტზე ხელმოწერამდე თბილისისა და ლუბლიანის მერებს შორის შეხვედრა გაიმართა, სადაც ქალაქებს შორის თანამშრომლობის შესახებ ისაუბრეს. დავით ნარმანიამ ლუბლიანის ოქროს წიგნში ჩანაწერი დატოვა და კოლეგა თბილისშიც მოიპატიჟა.
"ჩვენ რამდენიმე თვალსაზრისით ვთანამშრომლობთ: კერძოდ ეს არის მყარი ნარჩენების მართვის სფეროში გამოცდილების გაზიარება, ასევე მნიშვნელოვანია არქიტექტურულ საკითხებზე გამოცდილების მიღება. მომდევნო წელს ლუბლიანა ევროპის ყველაზე მწვანე ქალაქი ხდება და აქედან გამომდინარე გამწვანების პოლიტიკა და გამოცდილება, რაც მათ აქვთ ჩვენთვის ძალიან მნიშვნელოვანია. ამასთან ჩვენ შეგვიძლია ტურიზმთან და ქართული პროდუქციის ექსპორტთან დაკავშირებულ საკითხებზე ვიმუშაოთ. შემდეგი უკვე ლუბლიანის დელეგაციის ვიზიტი იქნება თბილისში, შესაბამისად იმ ძირითად მიმართულებებს დავგეგმავთ, რა მიმართულებებითაც ჩვენ შეგვიძლია აქტიურად ვიმუშაოთ და ურთიერთსასარგებლო შედეგი მივიღოთ",- განაცხადა დავით ნარმანიამ.
ლუბლიანის მერის ზორან იანკოვიჩის თქმით, თბილისსა და ლუბლიანას შორის 1977 წელს გაფორმებული დაძმობილების შესახებ ხელშეკრულება ერთ-ერთი უძველესია ლუბლიანის არქივში.
"ეს დოკუმენტი მნიშვნელოვანია, რათა ყველამ დაინახოს, რომ ის მუშაობს. პირველ რიგში უნდა ვეცადოთ ერთმანეთის გამოცდილებიდან ვისწავლოთ და ერთმანეთის შეცდომები არ დავუშვათ. ასევე მნიშვნელოვანია საკითხია ინვესტიციების გაცვლა. ჩვენ შეგვიძლია თანამშრომლობა საერთო კულტურული ღონისძიებების მოწყობით დავიწყოთ, მოვაწყოთ თბილისის დღეები ლუბლიანაში და პირიქით",- განაცხადა ზორან იანკოვიჩმა.
ლუბლიანაში ვიზიტის ფარგლებში თბილისის მერს ქალაქი თავად ლუბლიანის მერმა დაათვალიერებინა. დავით ნარმანია მყარი ნარჩენების გადამამუშავებელ ქარხანასაც ესტუმრა და ამ მიმართულებით ლუბლიანის გამოცდილებას გაეცნო.