პოლონეთში ევროპული ქარტიის 30 წლისთავთან დაკავშირებულ საერთაშორისო კონფერენციის ფარგლებში, თბილისის მერი დავით ნარმანია ვარშავის მერს ჰანა გრონკევიჩ-ვალტცს შეხვდა.
როგორც ,,ჯი-ეიჩ-ენს” მერიიდან აცნობეს, შეხვედრაზე ადგილობრივი ადმინისტრირების კუთხით ვარშავის გამოცდილებაზე ისაუბრეს.
თბილისის მერის დავით ნარმანიას განცხადებით, პოლონური მხარე ადგილობრივი დემოკრატიის განვითარების კუთხით საქართველოს მუდმივად ეხმარება.
"ვისაუბრეთ ადგილობრივი ადმინისტრირების კუთხით ვარშავის გამოცდილებაზე, ასევე განვიხილეთ რამდენიმე ძალიან საინტერესო მაგალითი , რაც მათ ურბანული განვითარების კუთხით გააჩნიათ",- განაცხადა დავით ნარმანიამ.
"მოხარული ვარ, რომ თბილისის მერთან შეხვედრის შესაძლებლობა მომეცა. განვიხილეთ ადგილობრივი თვითმმართველობის რეფორმები , საქართველოში ამ კუთხით ერთ-ერთი მრჩეველი სწორედ პოლონეთიდანაა. ადგილობრივი თვითმმართველობა ძალიან მნიშვნელოვანია და მის გარეშე დემოკრატიის მთლიანი სისტემა წარმოუდგენელია",- განაცხადა ვარშავის მერმა ჰანა გრონკევიჩ-ვალტცმა.
ევროპული ქარტიის 30 წლისთავთან დაკავშირებულ ღონისძიებაზე ევროპული ქარტიის შესრულების სტატუსსა და სამომავლო პერსპექრივებზე იმსჯელეს, განიხილეს მდგრად განვითარებასა და მრავალსაფეხურიან მმართველობასთან დაკავშირებული თემები, ისაუბრეს თვითმმართველობასა და ევროპულ ინტეგრაციაზე.
თბილისის მერის დავით ნარმანიას თქმით, საქართველო ქარტიის ხელმომწერი სახელმწიფოა. მისივე განცხადებით, პოლონური გამოცდილება მნიშვნელოვანია არა მხოლოდ კანონმდებლობის ჰარმონიზაციის კუთხით, არამედ ევროპული მართვის პრინციპების დანერგვის თვალსაზრისითაც.
"ჩვენ სწორედ აღნიშნული ქარტიის ძირითად პრინციპებზე დაფუძნებულ ადგილობრივ თვითმმართველობას ვაშენებთ, ამიტომაც პოლონური გამოცდილება ჩვენთვის ყოველთვის ძალიან საინტერესოა ქარტიის აღსრულებისა და კანონმდებლობის ჰარმონიზაციის თვალსაზრისით",- განაცხადა დავით ნარმანიამ.
ვარშავიდან თბილისის მერი ლუბლიანაში გაემგზავრება, სადაც ლუბლიანას მერთან ერთად ხელი მოეწერება ორ ქალაქს შორის დაძმობილების განახლებულ ხელშეკრულებას.