თბილისის მუნიციპალიტეტის საკრებულოს განათლებისა და კულტურის კომისიის თავმჯდომარე თამარ ტალიაშვილი ,,ერთიანი ნაციონალური მოძრაობის’’ წარმომადგენლების მიერ ბაღებში ჩატარებულ ტენდერებთან დაკავშირებით გაკეთებულ განცხადებას ეხმიანება და ოპონენტი კოლეგების ბრალდებებს აბსურდულს უწოდებს.
როგორც თამარ ტალიაშვილმა განაცხადა, წლის ბოლომდე დედაქალაქს 6 საბავშვო ბაღი შეემატება, მომავალი წლისთვის კი ათობით სკოლამდელი აღზრდის დაწესებულების მშენებლობაა დაგეგმილი. ,,ნაციონალური მოძრაობა ცდილობს გადაფაროს ის პროგრესი, რასაც ხელისუფლებამ ბაგა- ბაღებთან დაკავშირებით მიაღწია. წინა წელთან შედარებით ჩვენ შევძელით ბაღებში 5 ათასი ბავშვით მეტი მიგვეღო. ასევე იგეგმება რამდენიმე ახალი საბავშვო ბაღის გახსნა, რაც ასეულობით აღსაზრდელის ჩარიცხვის საშუალებას მოგვცემს“, - განაცხადა თამარ ტალიაშვილმა.
საკრებულოს კულტურისა და განათლების კომისიის თავმჯდომარემ საკვები პროდუქტის შესყიდვის მიზნით, ბაგა-ბაღებში გამოცხადებულ ტენდერებზეც ისაუბრა. თამარ ტალიაშვილის თქმით, ოპონენტ კოლეგებს მოსახლეობა შეცდომაში შეჰყავთ და ყოველგვარი არგუმენტაციის გარეშე ცდილობენ იმ წარმატების გადაფარვას, რაც ბავშვების ჯანსაღი კვებისათვის ხორციელდება.
,,ელექტრონული ტენდერები გამჭვირვალე და ნებისმიერი პირისთვის ხელმისაწვდომია“,- აღნიშნა თამარ ტალიაშვილმა და დასძინა, რომ იგი ოპონენტი კოლეგებისგან არც ელოდა დღევანდელი ხელისუფლების წარმატების აღიარებას.
