სახალხო დამცველმა უჩა ნანუაშვილმა ყოფილი თავდაცვის მინისტრი ბაჩო ახალაია მოინახულა. როგორც სოციალურ ქსელში ბაჩო ახალაიას მეუღლე ანი ნადარეიშვილი წერს, საუბრის ძირითადი თემა ორი საკითხი იყო.
,,დღეს, 15 სეტემბერს ომბუდსმენი უჩა ნანუაშვილი იყო შესული ბაჩო ახალაიასთან, საუბრის თემა შეეხებოდა მხოლოდ და მხოლოდ ორ საკითხს, მათ შეხვედრას ესწრებოდა ადვოკატი მალხაზ ველიჯანაშვილი. ბაჩომ ომბუდსმენს განუმარტა, რომ საქართველოს სახელმწიფოს ვალდებულებაა დაიცვას საქართველოს ყველა მოქალაქის უფლება, განსაკუთრებით იმ ადამიანებისა, ვინც ცხოვრობენ ოკუპირებულ ტერიტორიაზე და მხოლოდ იმიტომ განიცდიან დიდ უსამართლობას და ძალადობას, რომ არიან ეთნიკურად ქართველები. დღეს კი გვაქვს ძალზედ საგანგაშო ვითარება, აფხაზეთში დღითი დღე ძლიერდება ძალადობა ქართველებზე, მათ განსაკუთრებით ავიწროებენ ფინანსურად, გახშირდა ადამიანებზე ძალადობრივი ფაქტები, რომლებიც დიდი ხნის განმავლობაში არ არსებობდა, ყველაზე უფრო სახიფათოა ის, რომ გამორჩეული სისასტიკით ეპყრობიან იმ ადამიანებს და ოჯახებს რომლებიც ქართული სახელმწიფოებრიობისათვის სხვებზე მეტს აკეთებდნენ წლების განმავლობაში. გარკვეული პერიოდის წინ, ე.წ. აფხაზური სეპარატისტული სპეცსამსახურების მიერ თითქოსდა საქართველოს სასარგებლოდ ჯაშუშობისთვის დაკავებული იქნა რამოდენიმე ადამიანი, სწორედ მას შემდეგ დაიწყო ნადირობა თითქოსდა „საქართველოს ჯაშუშებზე“, კრიტერიუმი კი ერთია - საქართველოს პატრიოტობა.
უდიდეს კითხვის ნიშნებს ბადებს საქართველოს უსაფრთხოების სამსახური, მის მიმართ ადგილობრივ მოსახლეობაში გაჩენილია უნდობლობა, ნაცვლად მათი მხრიდან დაცვისა, ბევრი თვლის, რომ სწორედ საქართველოს უსაფრთხოების სამსახურის ხელთ არსებული ინფორმაცია არის აფხაზეთში უხმაუროდ მიმდინარე რეპრესიების გზამკვლევი. ამიტომაც უნდა მიექცეს ყურადღება ქართული საზოგადოების მხრიდან აფხაზეთში უხმაუროდ მიმდინარე მოვლენებს. იქ არ არსებობენ საქართველოს „აგენტები“ და ვერავინ უნდა გაბედოს ამ სახით ვინმეს რაიმე ფორმით დასჯა. იქ არიან მხოლოდ საქართველოს პატრიოტები, რომლებიც მადლობებს იმსახურებენ მთელი დანარჩენი საქართველოსგან, რადგან ინარჩუნებენ ქართული სახელმწიფოებრიობისა და ქართული ენის საფუძვლებს. უმძიმეს პირობებში ინარჩუნებენ თითოეული ჩვენთაგანის წილ საქართველოს ოკუპირებულ მიწაზე.არც ის იქნებოდა ურიგო, რომ ქართულმა საზოგადოებამ ოდნავი ყურადღება მაინც მიაქციოს აფხაზეთში მცხოვრებთა კიდევ ერთ მიმდინარე სატკივარს, რომელიც იქ მცხოვრებ თითოეულ ადამიანს აწუხებს, მათ საარსებო ერთადერთ წყაროს - თხილის მოსავალს უბრალოდ აყაჩაღებენ. თუ კახეთში რთველის პრობლემები დღეს აქტუალურია, წარმოიდგინეთ რა ხდება აფხაზეთში, ყოველგვარი მხარდაჭერის გარეშე სეპარატისტების და ბანდიტების პირისპირ მარტო დარჩენილ ადამიანებს ხმის ამოღების უფლებაც არ აქვთ!
საუბრის მეორე თემა შეეხებოდა უკანონო პატიმრობაში მყოფი, საქართველოსთვის თავდადებული ჯარისკაცების და პოლიციელების, კერძოდ, ზურაბ შამათავას, ალექსანდრე გორგაძის, რომა შამათავას, კობა თოდუას, კახა ნაკანის და სხვების სისხლის სამართლის საქმეებზე დარღვევებს და მათ უკანონო პატიმრობას.
უჩა ნანუაშვილმა ამ წუთებში დატოვა მატროსოვის მე-9 დაწესებულება”, _წერს ნადარეიშვილი.
