აჭარის ფინანსთა და ეკონომიკის მინისტრმა ახალი სასწავლო წელი ბარცხანის მე-17 სკოლას მიულოცა. საკუთარ პედაგოგებს და პირველკლასელებს მინისტრმა სიტყვით მიმართა და მათ წარმატებული სასწავლო წელი უსურვა.
"ახალი სასწავლო წლის დაწყებას გილოცავთ თითოეულ მოსწავლეს, პედაგოგს, მშობელს და ყველა იმ ადამიანს ვისთვისაც დღევანდელი დღე მნიშვნელოვანია. მოხარული და ძალიან ბედნიერი ვარ, რომ მაქვს პატივი წლების შემდეგ სწორედ ჩემს უსაყვარლეს სკოლას მივულოცო ეს დღე. იმ სკოლას, რომელმაც თავის დროზე ძალიან ბევრი რამ მომცა,მასწავლა ცხოვრების მთავარი ღირებულებები და პრიორიტეტები. ჩემი თითოეული შემდგომი წარმატება მნიშვნელოვნად სწორედ აქ გატარებულმა წლებმა განაპირობა.
გილოცავთ ამ სკოლის ძალიან ღირსეულ, გამორჩეულ და მისაბაძ პედაგოგებს დღევანდელ დღეს და გისურვებთ, რომ კიდევ არაერთი ღირსეული მოქალაქე აღუზარდოთ ქვეყანას. თქვენ კი სკოლის მოსწავლეებო ნათელი მომავალი გქონდეთ და გეცხოვროთ ძლიერ და ერთიან ქვეყანაში.
კიდევ ერთხელ გილოცავთ ახალი სასწავლო წლის დაწყებას და გისურვებთ ნაყოფიერ წელს" - განაცხადა დავით ბალაძემ.
ახალი სასწავლო წელი ბარცხანის მე-17 სკოლაში საქართველოს ჰიმნით და სახელმწიფო დროშის აღმართვით გაიხსნა. სკოლას წელს სულ 37 პირველკლასელი ჰყავს.
