თბილისის ზოოპარკი დღეს, 13 ივნისის სტიქიიდან ზუსტად 3 თვის შემდეგ, გაიხსნა. დილის 10:00 საათიდან ზოოპარკი უკვე ღიაა, გახსნის ოფიციალური ნაწილი კი 12:00 საათზე დაიწყო და ცერემონიალის ფარგლებში მოეწყო ფოტოგამოფენა.
ვიზიტორები მხოლოდ ზოოპარკის ზედა ნაწილის დათვალიერებას შეძლებენ. სწორედ ამ ტერიტორიის აღდგენა გახდა შესაძლებელი სარეაბილიტაციო სამუშაოების შედეგად.
ზოოპარკის ადმინისტრაციის განცხადებით, სტიქიის შედეგად მთლიანად განადგურებული ქვედა ტერიტორიის აღდგენა და აღნიშნულ ადგილზე ახალი ვოლიერების მშენებლობა არ იგეგმება.
თბილისის ზოოპარკი 2016 წლის გაზაფხულისთვის ახალი ცხოველების ჩამოყვანას გეგმავს. გარდა ამისა უკვე დამტკიცებულია თბილისის ზღვის მიმდებარე ტერიტორიაზე ახალი ზოოპარკის მშენებლობის პროექტიც, რაც სავარაუდოდ, სამი წლის განმავლობაში განხორციელდება.
