პრემიერ-მინისტრის გადაწყვეტილებით, ანტალიაში დარჩენილ საქართველოს მოქალაქეებს დღეს ღამით სპეციალური რეისით სამშობლოში დააბრუნებენ, - ამის შესახებ განცხადებას საქართველოს პრემიერ-მინისტრის პრესსამასახური ავრცელებს.
,,ჩინეთში სამუშაო ვიზიტით მყოფი საქართველოს პრემიერ-მინისტრ ირაკლი ღარიბაშვილისთვის ცნობილი გახდა, რომ საქართველოს მოქალაქეები ვერ ახერხებს თურქეთის ქალაქ ანტალიიდან სამშობლოში დაბრუნებას. მგზავრებს შორის იმყოფებიან მცირეწლოვანი ბავშვები. მთავრობის მეთაურმა დაავალა სპეციალურ სამსახურებს, დაადგინონ რა გახდა მომხდარის მიზეზი და მოახდინონ რეაგირება. დღესვე საქართველოს მოქალაქეებს სპეციალური რეისით სამშობლოში დააბრუნებენ. ხარჯებს საქართველოს მთავრობა გაიღებს”, - ნათქვამია განცხადებაში.
შეგახსენებთ, სააგენტო ”ჯი-ეიჩ-ენს” თურქეთში საქართველოს საელჩოში განუცხადეს, რომ საელჩო ამ პრობლემის მოგვარებაში ვერ ჩაერევა, რადგანაც პრობლემა საქართველოშია - ორ ქართულ კომპანიას შორის.
”პრობლემის მოგვარებას ვხედავ იმაში, რომ ალბათ სხვა ავიაკომპანიის საშუალებით უნდა გადმოფრინდნენ და სამშობლოში დაბრუნების შემდეგ უჩივლონ იმ კომპანიას, რომელმაც არ შეასრულა თავისი მოვალეობა”,- აღნიშნა თურქეთის რესპუბლიკაში საქართველოს საელჩოს კონსულმა ჯემალ გოგიტიძემ.