თურქეთის საკურორტო ქალაქ ანტალიაში ჩარჩენილ საქართველოს 150 მოქალაქეს სამშობლოში Georgian Airways-ი გადმოიყვანს. ამის შესახებ „ჯი-ეიჩ-ენს“ Georgian Airways-ის (აირზენა) გენერალურმა დირექტორმა იასე ზაუტაშვილმა განუცხადა.
მისი თქმით, Georgian Airways-ი (აირზენა), დღეს და ხვალ უზრუნველყოფს ანტალიაში ჩარჩენილი მგზავრების საქართველოში გადმოყვანას. Georgian Airways-ის მომსახურების საფასურის გადახდაზე გარანტორი კი, საქართველოს მთავრობა იქნება.
შეგახსენებთ, რომ ანტალიაში ჩარჩენილ საქართველოს მოქალაქეებს თურქეთის საელჩო ურჩევს ქვეყანაში დაბრუნებისთვის სხვა ავიაკომპანიით ისარგებლონ და შემდეგAlltours-ს უჩივლონ და საკითხი გაარკვიონ. როგორც სააგენტო ”ჯი-ეიჩ-ენს” თურქეთში საქართველოს საელჩოში განუცხადეს, საელჩო ამ დროისათვის პრობლემის მოგვარებაში არ ჩარეულა. საელჩოში ადასტურებენ, რომ საქართველოს მოქალაქეები მათ წუხელ დაუკავშირდნენ და დახმარება ითხოვეს.
”საელჩო ამ პრობლემის მოგვარებაში ვერ ჩაერევა, რადგანაც პრობლემა საქართველოშია - ორ ქართულ კომპანიას შორის”- აღნიშნა თურქეთის რესპუბლიკაში საქართველოს საელჩოს კონსულმა ჯემალ გოგიტიძემ.
როგორც კონსული აცხადებს, საქართველოს მოქალაქეები უნდა ეცადონ და სამშობლოში სხვა ავიაკომპანიის საშუალებით დაბრუნდნენ.
”პრობლემის მოგვარებას ვხედავ იმაში, რომ ალბათ სხვა ავიაკომპანიის საშუალებით უნდა გადმოფრინდნენ და სამშობლოში დაბრუნების შემდეგ უჩივლონ იმ კომპანიას, რომელმაც არ შეასრულა თავისი მოვალეობა”,- აცხადებს გოგოტიძე.
ჟურნალისტის შეკითხვაზე, საქართველოს მოქალაქეები ქვეყანაში საკუთარი ხარჯებით უნდა დაბრუნდნენ თუ არა, კონსული პასუხობს, რომ ”ეს არის უფრო მაღალ დონეზე გადასაწყვეტი საკითხი”.
დღეს დღის განმავლობაში ვრცელდებოდა ინფორმაცია, რომ ანტალიის აეროპორტიდან მგზავრების გადმოყვანას ავიაკომპანია Georgian Airways-ი (აირზენა) უზრუნველყოფდა, თუმცა, საბოლოო ავიაკომპანიამ დაადასტურა, რომ ტურისტულ კომპანია Alltours-ს მათთვის ფრენისათვის საჭირო თანხა არ გადაურიცხია და შესაბამისად ისინი ანტალიიდან რეისს ვერ შეასრულებენ.
შეგახსენებთ, რომ საქართველოს 150 მოქალაქე თურქეთიდან დაბრუნებას ვერ ახერხებს. როგორც „ფეისბუქზე“ ერთ-ერთი მგზავრი, ირინა საყვარელიძე წერს, მგზავრებს შორის ბავშვებიც არიან.
„კომპანია - "აირზენას" და " Alltours" -ის დამსახურებით, საქართველოს 150 მოქალაქე, მათ შორის მცირეწლოვანი ბავშვები-ვიმყოფებოდით ანტალიის აეროპორტში დღის 4 საათიდან ღამის 1 საათამდე, (Alltours-მა არ ჩაურიცხა “აირზენას” ფრენის ნაწილი საფასური, როგორც გავარკვიეთ და აირზენამ ფრენა გააუქმა... დაგვტოვა ჰაერში (ნეტა ჰაერში მაინც ვყოფილიყავით) Welcome to Georgia:) გაოცებულმა, ანტალიის აეროპორტის თანამშრომლებმა გვითხრეს, რომ "აირზენამ" - უარი გვითხრა- წყალი და საკვები მოგცეთ და თუ კიდევ ერთხელ შევაწუხებთ თქვენ დაბინავებაზე, საქართველო თურქეთს საჰაერო გზას ჩაუკეტავსო(ეს იმედია, “აირზენას” არაპროფესიონალი, უცოდინარი ახალბედა თანამშრომლის ნაბოდვარია). ღამის 1-დან 2 საათამდე ვიჯექით ქუჩაში და ველოდებოდით ავტობუსს. კვლავ, თურქეთის აეროპორტის თანამშრომლებმა იზრუნეს ჩვენს ჩაბარგებასა და გადანაწილებაზე. დაახლოებით 30 წუთია დაგვაბინავეს "სასტუმროში" - სადაც თეთრეულიც კი არ არის გამოცვლილი. ხვალ, ან ჩამოფირინდება "აირზენას" თვითმფრინავი ან არა. ისევ გაურკვევლობაში ვართ..- წერს საყვარელიძე.