თბილისის მერიის განათლების, სპორტისა და ახალგაზრდულ საქმეთა საქალაქო სამსახურის უფროსი გიორგი არეშიძე აცხადებს, რომ ახალგაზრდული ბანაკის ორგანიზებისთვის გადარიცხულ თანხებზე, თითოეულ ლართან დაკავშირებით, დაინტერესებულ პირებს დეტალურ ინფორმაციას მიაწვდის.
დღეს გამართულ პრესკონფერენციაზე არეშიძე მის მიმართ გამოთქმულ ბრალდებებს გამოეხმაურა და განაცხადა, რომ "ნაციონალური მოძრაობის" მხრიდან მიზანმიმართულ დისრედიტაციას აქვს ადგილი. მისი თქმით, ენმ არასამთავრობო ორგანიზაციებს იყენებს და მათი სახელით საუბრობს.
,,პირადად ვარ პასუხისმგებელი დედაქალაქის მერიის მხრიდან ბანაკის ორგანიზებისთვის გადარიცხულ თითოეულ ლარზე და საკითხთან დაკავშირებით დაინტერესებულ პირებს შემიძლია დეტალური ინფორმაცია მივაწოდო. ხაზგასმით მინდა აღვნიშნი, რომ ბანაკის ორგანიზებისას სამართლებრივ ნაწილში კანონის დარღვევასთან, მინიმალურ გადაცდომასთანაც კი საქმე არ გვქონია. რაც შეეხება შინაარსობრივ ნაწილს, ბანაკმა ჩაიარა იდეალურად და სწორედ ეს გახდა "ნაციონალური მოძრაობის" გაღიზიანების მიზეზი, ისინი გამუდმებით ცდილობენ დედაქალაქის მთავრობის მიერ განხორციელებულ ყველა წარმატებულ პროექტს მსგავსი მეთოდებით დაუპირისპირდნენ. ასევე მინდა გამოვეხმაურო ბრალდებას, თითქოს მე კონტრაქტი გავაფორმე ჩემს მეგობართან. ეს არის სრული სიცრუე, რადგან ბუნებრივია მყავს ძალიან ბევრი ნაცნობი, ახლო ადამიანი, მეგობარი და საქმიანი კავშირები არასდროს ყოფილა ამ ურთიერთობების ხელისშემშლელი ფაქტორი", - განაცხადა არეშიძემ.
იგი არასამთავრობო ორგანიზაციის წარმომადგენელ გივი კუბლაშვილისგან ბოდიშის მოხდას ითხოვს და ასევე მზადყოფნას გამოთქვამს ითანამშრომლოს საგამოძიებო ორგანოებთან.
,,მოვითხოვ ბოდიშის მოხდას გივი კუბლაშვილისგან, წინააღმდეგ შემთხვევაში, გამოვიყენებ კანონის მიერ ჩემთვის მონიჭებულ ყველა უფლებამოსილებას. ასევე, დამატებითი კითხვების არსებობის შემთხვევაში, ვაპირებ ვითანამშრომლო შესაბამის საგამოძიებო ორგანოებთან" - დასძინა არეშიძემ.