საქართველო ძალიან ახლოსაა იმასთან, რომ ჰარვარდის უნივერსიტეტში ქართველოლოგიის ცენტრი გაიხსნას, - ამის შესახებ პარლამენტის თავმჯდომარემ დავით უსუფაშვილმა პარლამენტში მიმდინარე კონფერენციის - „ენა და თანამედროვე ტექნოლოგიების“ შემდეგ, ჟურნალისტებთან განაცხადა.
მისი შეფასებით, საქართველოს პარლამენტი მნიშვნელოვან კონფერენციას მასპინძლობს და ესაა გაგრძელება ხელისუფლების მიერ აქტიურად დაწყებული პროცესის.
,,ცოტა ხსნის წინ, პარლამენტმა „სახელმწიფო ენის შესახებ“ კანონი მიიღო. პარლამენტის ეგიდით მოღვაწე საქართველოს ეროვნულმა ბიბლიოთეკამ ქართველ და უცხოელ მეცნიერებს ის რესურსები შესთავაზა, რაც ბიბლიოთეკას გააჩნია და მან ბინა დაიდო ქართული ენის ეროვნულ კონკურსს. ეს არის თანამედროვე უახლოესი ტექნოლოგიების შესაბამისად შექმნილი ქართული ენის მონაცემთა ბაზა. ეს უკიდურესად აუცილებელია იმისთვის, რომ ენა არა მხოლოდ გადარჩეს, არამედ განვითარდეს. ჩვენი მიდგომა ისაა, რომ ქართულ ენას ვერ გადავარჩენთ და ვერ დავიცავთ სანქციებით, ჯარიმებით და ვინმეს იძულებით, რომ ისწავლოს ენა. ქართული ენა სამოტივაციო სისტემის შექმნით და თანამედროვე ტექნოლოგიების ათვისებით უნდა გადავარჩინოთ“, - აცხადებს უსუფაშვილი.
იგი მიიჩნევს, რომ ინტერნეტში ერთმანეთთან კომუნიკაცია ქართული სიტყვებითა და ქართული ასოებით უნდა გვქონდეს.
,,თუ ეს არ გავაკეთეთ, ქართული ენა ძალიან დაზარალდება და შესაძლოა, მას გამოუსწორებელი ზიანი მოვაყენოთ. ერთი წუთით წარმოიდგინეთ, რომ ვახტანგ მეექვსეს ბეჭდვითი ტექნოლოგიები რომ არ შემოეტანა და ენის დამახინჯებისთვის სანქციები გაეზარდა, მაშინ რა მოხდებოდა? - მაშინ, ქართული ენა გაქრებოდა იმიტომ, რომ თავის დროზე, ბეჭდვითი ტექნოლოგიების შემოტანა ისეთივე ნოვაცია იყო, როგორც დღეს არის - ინტერნეტი და სხვა ელექტრონული ტექნოლოგია. ძალიან სასიამოვნოა, რომ ქართველი მეცნიერები ამ საქმეში აქტიურად არიან ჩართულნი“, - აცხადებს უსუფაშვილი.
კონფერენციას მსოფლიოში აღიარებული ფილოლოგები და ენათმეცნიერები ესწრებიან.