კახეთში რთველი დღეს საპროტესტო აქციის ფონზე დაიწყო. გლეხები ქარხნების გახსნას და ყურძენზე ფასის მომატატებას ითხოვენ.
მევენახეების ინფორმაციით, ამ დრომდე არ არის ჩასაბარებელი ცენტრები, სადაც ისინი საკუთარი მოსავლის ჩაბარებას შეძლებენ, თუნდაც ამ დროისთვის დადგენილი ფასის მიხედვით.
ადგილზე იმყოფება ღვინის ეროვნული სააგენტოს ხელმძღვანელი. გიორგი სამანიშვილის განცხადებით, კახეთში ჩაუბარებელი ყურძენი არ დარჩება.
მევენახეები არ გამორიცხავენ, რომ პროტესტმა უფრო მასშტაბური ხასიათი მიიღოს. მოთხოვნების დაუკმაყოფილებლობის შემთხვევაში ისინი საკუთარი ვენახების გაჩეხვითაც იმუქრებიან.
აღსანიშნავია, რომ გუშინ, მედია კავშირ ობიექტივის ეთერში სოფლის მეურნეობის მინისტრის მოადგილემ გოჩა ცოფურიშვილმ აღნიშნა, რომ წელს მძიმე რთველი იქნება, რადგანაც ქარხნებს უკვე დაგროვილი აქვთ ღვინის მნიშვნელოვანი მარაგები, რაც რუსეთსა და უკარინაში ექსპორტის კლების გამო გაუყიდავი დარჩათ.
ღვინის ეროვნული სააგენტოს თავმჯდომარემ გიორგი სამანიშვილმა კი განაცხადა, რომ მევენახეები ღვინის სახლში დამზადების ტრადიციას უნდა დაუბრუნდნენ.
"მე მოვუწოდებდი ყველას, რომ დავუბრუნდეთ ღვინის სახლში დამზადებას, ყველას გვაქვს სახლში ქვევრები, ჩვენ თუ ყველა ჩვენ ღვინოს ვაწარმოებთ და ღვინის მოხმარებას დავუბრუნდებით, ყურძენზე ფასიც გაიზრდება და კიდევ ახალი ვენახების გაშენება გახდება საჭირო", - განაცხადა სამანიშვილმა.
"რთველი 2015" დღეს ოფიციალუარდ დაიწყო.
