საზოგადოებრივი მაუწყებლის ჟურნალისტის, ეკა მიშველაძის მიერ გადაცემა „არჩევნაში“ გაკეთებულ განცხადებასთან დაკავშირებით, არასამთავრობო ორგანიზაციები გამოძიების დაწყებას ითხოვნ.
"სამოქალაქო საზოგადოება გამუდმებით საუბრობს მოქალაქეთა, მათ შორის საჯარო პირების, პირადი ცხოვრების ხელყოფის პრობლემებზე. სწორედ ამ მნიშვნელოვანი სამოქალაქო თავისუფლების დასაცავად 2013 წელს დაიწყო კამპანია „ეს შენ გეხება – ისევ გვისმენენ.“
მიუხედავად იმისა, რომ დღევანდელი ხელისუფლების წარმომადგენლები ოპოზიციაში ყოფნის დროს თავადაც გახდნენ მასობრივი მოსმენების დამკვიდრებული სისტემის მსხვერპლნი, კოალიცია ქართული ოცნების მთავრობას მაინც არ აღმოაჩნდა პოლიტიკური ნება, უარი ეთქვა საბჭოური სისტემის ამ მანკიერ დანატოვარზე. საზოგადოების აქტიური პროტესტის მიუხედავად, დღეს სამართალდამცავი ორგანოები კვლავ ინარჩუნებენ ტოტალური მოსმენების განხორციელების შესაძლებლობას.
კამპანიის „ეს შენ გეხება – ისევ გვისმენენ“ ადვოკატირებით, 2014 წლის 1 აგვისტოს პარლამენტმა მიიღო საკანონმდებლო ცვლილებები, რომელიც მნიშვნელოვნად აუმჯობესებდა ფარული საგამოძიებო მოქმედების განხორციელებისას ადამიანის უფლებების დაცვის სტანდარტს. თუმცა, იმავე წლის ნოემბერში მიღებული კანონით, პარლამენტმა, ფაქტობრივად, დააკანონა სამართალდამცავი ორგანოების პირდაპირი და შეუზღუდავი წვდომა მოქალაქეთა პერსონალურ კომუნიკაციაზე. აღსანიშნავია, რომ პრეზიდენტმა ამ ცვლილებებს ვეტო დაადო, რამაც პარლამენტს საკითხზე ხელახლა მსჯელობის შესაძლებლობა მისცა. დეპუტატებმა მხარი მეორედაც კანონის იმ ვერსიას დაუჭირეს, რომელიც სამართალდამცავი ორგანოების მიერ იყო მოწონებული. კამპანიაში „ეს შენ გეხება – ისევ გვისმენენ“ გაერთიანებული ორგანიზაციები მიიჩნევენ, რომ კანონში არსებული ნორმები მოქალაქეების კონსტიტუციურ უფლებებს ლახავს და მათი გაუქმების მიზნით საკონსტიტუციო სასამართლოს მიმართა.
საზოგადოებრივი მაუწყებლის პოლიტიკური თოქშოუს „პირველი სტუდიის“ ავტორმა და წამყვანმა მასზე და მის მეუღლეზე, ოპოზიციური პარტიის, „თავისუფალი დემოკრატების“ ერთ-ერთ ლიდერ, ალექსი პეტრიაშვილზე განხორციელებული თვალთვალის შესახებ გავრცელებული ინფორმაცია საჯაროდ დაადასტურა. რამდენიმე დღის წინ გავრცელდა ინფორმაცია საზოგადოებრივ მაუწყებელზე ეკა მიშველაძის საავტორო გადაცემის „პირველი სტუდიის“ დახურვასთან დაკავშირებით. 4 სექტემბერს საზოგადოებრივი მაუწყებლის გენერალური დირექტორის მრჩეველმა, ბასა ჯანიკაშვილმა განაცხადა, რომ ეკა მიშველაძეს ალექსი პეტრიაშვილზე დაქორწინების გამო ინტერესთა კონფლიქტი აქვს, თუმცა საზოგადოებრივ მაუწყებელს ამ საკითხზე ჯერ ოფიციალური განცხადება არ გაუკეთებია.
ეკა მიშველაძესთან დაკავშირებულ შემთხვევაში კონტექსტს ამძიმებს ის გარემოებაც, რომ საზოგადოებრივი არხის ჟურნალისტთან ერთად, თვალთვალი, სავარაუდოდ, ხორციელდებოდა ოპოზიციური პოლიტიკური პარტიის ერთ-ერთ ლიდერზეც.
ეს არ არის პირველი შემთხვევა, როდესაც ჟურნალისტებზე ფარული მიყურადებისა და თვალთვალის ეჭვი გაჩნდა. 2014 წლის მაისში ტელეკომპანია „რუსთავი 2“-ში აღმოაჩინეს ფარული ვიდეო აპარატურა. სამწუხაროდ, დღემდე არ არის ცნობილი ინფორმაცია ამ საქმის გამოძიების მიმდინარეობის შესახებ, რაც ამ მიმართულებით სამართალდამცავი ორგანოების არაეფექტურ საქმიანობაზე მიუთითებს" - ნათქვამია „ეს შენ გეხებას!“ განცხადებაში.
”სანამ ყველა გაიგებდა, სპეცსამსახურებმა იცოდნენ ჩემი და ალექსი პერტიაშვილის ურთიერთობის შესახებ,” - ეს სკანდალური განცხადება ,,რუსთავი-2”-ის პირდაპირ ეთერში ტელეწამყვანმა ეკა მიშველაძემ გააკეთა.
,,არჩევანში” მიშველაძეს თემაზე დეტალურად არ უსაუბრია და მხოლოდ მცირე კომენტარით შემოიფარგლა.
”მანამდე, ვიდრე საზოგადოებრივი მაუწყებლის მრჩეველი გაიგებდა, რომ მე და ალექსი პეტრიაშვილი დავქორწინდით, ამის შესახებ იზრუნეს და შესაბამისმა სამსახურებმა იცოდნენ ჩემსა და ალექსი პეტრიაშვილს შორის არსებული ურთიერთობის შესახებ. ამაზე მეტს არაფერს ვიტყვი. გასაგებად ვთქვი, რაც ვთქვი,” - განაცხადა ეკა მიშველაძემ.
