თბილისის მერმა დავით ნარმანიამ მთავრობის სხდომის დაწყების წინ, ელექტროენერგიის სუბსიდირებასთან დაკავშირებით განმარტება გააკეთა, თუმცა მერი არ აკონკრეტებს, შეეხება თუ არა სოციალურად დაუცველი სტატუსის მქონე ყველა ოჯახს ელექტროენერგიის სუბსიდირება.
„ჩვენი მხრიდან გადაწყვეტილება იქნება მიღებული, რაც გულისხმობს თითოეული სოციალურად დაუცველი ოჯახისთვის სუფსიდირებას იმ ნაზარდისა, რაც არის შესაბამისი გადაწყვეტილების საფუძველზე და დამატებით ხარჯებს გულისხმობს ელექტრონერგიაზე. აქედან გამომდინარე ,ყველა ის ოჯახი, რომელიც სოციალურად დაუცველია და ამ თვალსაზრისით დახმარებას საჭიროებს, თბილისის მერიის მხრიდან მხარდაჭერილი იქნება,“-განაცხადა დავით ნარმანიამ.
შეგახსენებთ, რომ საქართველოს ენერგეტიკისა და წყალმომარაგების მარეგულირებელი ეროვნული კომისიის დღევანდელი გადაწყვეტილებით, ელექტროენერგიის შესყიდვის საუშალო შეწონილი ფასი , რომელიც იყო 5.480 თ/კვტსთ და ამჟამად 11.173 თ/კვტსთ გახდა. შესაბამისად მოიმატა დედაქალაქში სამომხმარებლო ტარიფმა.
სემეკ-ის გადაწყვეტილებით, დღგ-ს გარეშე, 101 კვტსთ-ის ჩათვლით - დენის ფასი 8.034 თეთრი/კვტსთ ნაცვლად, იქნება 11.000 თ/კვტსთ; 101 კვტსთ-დან 301 კვტსთ-ის ჩათვლით, 10.56 თეთრი/კვტსთ ნაცვლად, ფასი იქნება 14.400 თ/კვტსთ; 301 კვტსთ-დან და მეტი - 14.998 თეთრი/კვტსთ ნაცვლად, 18.200 თ/კვტსთ.
ახალი ტარიფის დადგენის მიზნით, "თელასმა" კომისიას მიმდინარე წლის 23 ივლისს მიმართა. კომპანიამ სატარიფო განაცხადის წარდგენის მთავარ საფუძვლად აშშ დოლართან მიმართებაში ეროვნული ვალუტის გაცვლითი კურსის არსებითი ცვლილება, შესასყიდი ელექტროენერგიის გაზრდილი ფასი და ელექტროენერგიის გადაცემის ტარიფის ზრდა დაასახელა.
მერია კი სოციალურად დაუცველებისთვის ელექტროენერგიის გაზრდილი გადასახადის სუბსიდირებას გეგმავს.
