ევროპის საბჭო, ცენტრალური და ადგილობრივი ხელისუფლების ორგანოებთან თანამშრომლობით, მარნეულსა და ბოლნისის მუნიციპალიტეტში მცხოვრებ საქართველოს აზერბაიჯანულენოვან მოქალაქეებთან 4 სექტემბერს ბოლნისში "რეგიონულ ან უმცირესობათა ენების ევროპული ქარტიის" შესახებ საინფორმაციო შეხვედრის ჩატარებას გეგმავს.
როგორც შეხვედრის ორგანიზატორები აცხადებენ, აღნიშნული ქარტიის ხელმოწერისა და რატიფიცირების ვალდებულება საქართველომ 1999 წელს ევროპის საბჭოში გაწევრიანებისას აიღო. როგორც ევროპის საბჭოს ერთ-ერთი ძირითადი კონვენცია, ქარტია იცავს უმცირესობათა ენებს, განიხილავს რა მათ ქვეყნის კულტურული მემკვიდრეობის ნაწილად.
ორგანიზატორების თქმით, შეხვედრაზე დაგეგმილია ადგილობრივი თვითმმართველობის ორგანოებისა და აზერბაიჯანულ ენეზე მოსაუბრე მოსახლეობისათვის ინფორმაციის მიწოდება იმაზე, თუ როგორ დაეხმარებათ მათ ქარტია აღნიშნული ენის დაცვაში.
"აზერბაიჯანულ ენაზე მოსაუბრე მოსახლეობის წარმომადგენლებს საშუალება მიეცემათ ასევე ისაუბრონ მათი ენის ამჟამინდელ მდგომარეობასა და განვითარების საშუალოვადიან პერსპექტივებზე. გარდა ამისა, მსოფლიო ბანკისა და საქართველოს კულტურული მემკვიდრეობის ეროვნული სააგენტოს წარმომადგენლები ისაუბრებენ საქართველოში ადგილობრივი ტურიზმის განვითარების საქმეში ეთნიკური უმცირესობების კულტურულ ძეგლების როლზე. შეხვედრის ორგანიზება მოხდება ევროკავშირისა და ევროპის საბჭოს ერთობლივი პროექტის "ეროვნულ უმცირესობათა სამოქალაქო ინტეგრაცია საქართველოში და რეგიონული ან უმცირესობათა ენების ევროპული ქარტია" ფარგლებში", - ნათქვამია განცხადებაში.
2015 წლის სექტემბრის ბოლოს დაგეგმილია მსგავსი ტიპის შეხვედრების გამართვა ბათუმსა და თბილისში აფხაზურ, უკრაინულ, კურმანჯი/ქურთულ, გერმანულ, რუსულ, პოლონერ და ბერძნულ ენებზე მოსაუბრეთა და ადგილობრივი თვითმმართველობის ორგანოების წარმომადგენლებისთვის.
