პარლამენტის განათლებისა და მეცნიერების კომიტეტის თავმჯდომარის მოადგილე ნუკრი ქანთარია აბიტურიენტების ნაწილის პროტესტს გამოეხმაურა და აღნიშნა, რომ თუკი კანონის დარღვევას არ გამოიწვევს, ახალგაზრდებს სწავლის საშუალება უნდა მიეცეთ.
"ვფიქრობ, რომ თუკი არის ოდნავი შანსი კანონი არ დაირღვეს და სამართლიანობის პრინციპებიდან გამომდინარე, ბავშვები არ დაიჩაგრონ, ყველაფერი უნდა გაკეთდეს იმისთვის, რომ ახალგაზრდებს სწავლის საშუალება მიეცეთ. ეროვნული გამოცდების სპეციფიკაში არ ვიცი, რა და როგორ არის. იქ საკმაოდ გამოცდილი ხალხია და ვფიქრობ, რომ მათი გადაწყვეტილება ობიექტური იქნება. ჩემი დამოკიდებულება ასეთია, რომ ისინი არ ითხოვენ მარიხუანის ლეგალიზაციას, ისინი ითხოვენ, რომ ისწავლონ, თან გარკვეული ბარიერი გადალახეს. თუ ამის საშუალება არის და ამით არ დაირღვევა გარკვეული პრინციპები, მე მგონი, რომ ასეთი რამ საერთოდ ახალგაზრდების მხარეს უნდა გადაწყდეს", - განაცხადა ქანთარიამ.
შეგახსენებთ, რომ აბიტურიენტებმა გუშინ განათლების სამინისტროსთან აქცია გამართეს, რომელიც შემდეგ შიმშილობის აქციაში გადაიზარდა. სამინისტროსთან შეკრებილები აცხადებდნენ, რომ მათ ეროვნული გამოცდების კომპეტენციის ზღვარი გადალახეს, თუმცა ვერც ერთ უმაღლეს სასწავლებლებში ვერ მოხვდნენ. მათივე ინფორმაციით, ასეთი 700-მდე აბიტურიენტია. აქციის მონაწილეები სამინისტროსგან მეორადი ჩარიცხვების განხორციელებას ითხოვდნენ.