“რეაქციისა“ და „იმედის კვირის" პროდიუსერები და ჟურნალისტები ერთობლივ განცხადებას ავრცელებენ, სადაც გამოთქვამენ ეჭვს, რომ ორი მაღალრეიტინგული გადაცემის დახურვა პოლიტიკური გადაწყვეტილებაა.
“ჩვენთვის მიუღებელია ის განცხადება, რომელიც არხის ხელმძღვანელობამ გაავრცელა. საეჭვოა, კომერციულ არხს ისეთი მაღალრეიტინგული, პოპულარული და კომერციულად მომგებიანი გადაცემები, როგორიცაა „რეაქცია„ და „იმედის კვირა“ საკუთარი ნებით შეეჩერებინა ახალი სატელევიზიო სეზონის დასაწყისში, თან არჩევნებამდე 1 წლით ადრე. მიუღებელია ის ფორმაც, რომლითაც არხის მენეჯმენტმა აღნიშნული გადაწყვეტილება გაახმოვანა, რადგან 29 აგვისტომდე არცერთი მინიშნება და შეტყობინება შემოქმედებითი ჯგუფების წევრებს არ მიუღიათ. ჩვენ დაგვაყენეს ფაქტის წინაშე. აქედან გამომდინარე, ჩნდება საფუძვლიანი ეჭვი, რომ ეს არის პოლიტიკური გადაწყვეტილება. მით უფრო, რომ ბოლო პერიოდში ხშირად ისმოდა ხელისუფლების ზოგიერთი წარმომადგენლის უკმაყოფილო განცხადებები ამ გადაცემების მისამართით.
იმედია, ტელევიზიის ხელმძღვანელობა საჯაროდ ახსნის გადაწყვეტილების რეალურ მიზეზს და მოტივს, თუ რა მოხდა სინამდვილეში და რის გამო მოხსნეს ეთერიდან არხის ყველაზე რეიტინგული ჟურნალისტი პოლიტიკური თოქ-შოუების წამყვანი ინგა გრიგოლია. გვინდა გვჯეროდეს, რომ ტელეკომპანია „იმედი“ არ დარჩება პოლიტიკურ- საზოგადოებრივი თოქ-შოუების გარეშე და ჟურნალისტებს მიეცემათ თავისუფალი მუშაობის საშუალება”, - ნათქვამია განცხადებაში.
ინფორმაცია იმის შესახებ, რომ „რეაქცია“ და „იმედის კვირა“ იხურება, ორი დღის წინ გავრცელდა. გამოითქვა ეჭვი, რომ ეს გადაწყვეტილება არხის ხელმძღვანელობამ ხელისუფლების ზეწოლით, პოლიტიკური მოტივით მიიღო.
მოგვიანებით ტელეკომპანია „იმედმა“ განმარტა, რომ საზოგადოებრივ-პოლიტიკური თოქშოუების სეგმენტს დროებით აჩერებს. „ამის მიზეზია ჩვენი სურვილი შევცვალოთ არსებული გადაცემების ფორმატი და შევიმუშავოთ თვისობრივად ახალი სატელევიზიო პროდუქტი, რომელსაც შევთავაზებთ მაყურებელს 2016 წლიდან“, - აღნიშნულია ტელეკომპანიის განცხადებაში.
