"ნაციონალური მოძრაობა" დავით სერგეენკოს საარსებო შემწეობის გარეშე დარჩენილი სოციალურად დაუცველების 280 განცხადებას უგზავნის.
ენმ-ს სამოქალაქო საზოგადოებასთან ურთიერთობის მდივანმა, ზურაბ ჭიაბერაშვილმა პრესკონფერენციაზე სოციალური დახმარების გარეშე დარჩენილი მოქალაქეების განცხადებები წარადგინა და აღნიშნა, რომ პარტია საქართველოს ყველა რაიონში აგრძელებს ამ ოჯახების აღწერას.
"280 ოჯახი, რომლებმაც განცხადებით "ნაციონალურ მოძრაობას" მომართეს, უმნიშვნელო ნაწილია იმ ათიათასობით ოჯახისა, რომლებიც ბიძინა ივანიშვილის მმართველობის პერიოდში საარსებო შემწეობის გარეშე დარჩნენ.
შეგახსენებთ, "ქართული ოცნების" ხელისუფლებაში ყოფნის პერიოდში საარსებო შემწეობის გარეშე დარჩა 27,000 ბავშვი, ასევე 30,000 პენსიონერი, რომელთაგან ნახევარზე მეტი მარტოხელაა.
ზოგადად, 2013 წლის იანვრიდან დღემდე საარსებო შემწეობის მიმღებ პირთა რაოდენობა 506,245-დან 377,971 მოქალაქემდე შემცირდა იმ დროს, როდესაც ივანიშვილის მთავრობის არასწორი ეკონომიკური პოლიტიკის გამო სულ უფრო მეტი და მეტი ოჯახი ვარდება უკიდურეს სიღარიბეში.
აღსანიშნავია, რომ 2014 წლის იანვართან შედარებით, მთავრობა თვეში 4 მლნ ლარით ნაკლებს ხარჯავს გაჭირვებულ ადამიანებზე მაშინ, როდესაც თვეში 30 მლნ ლარით არის გაზრდილი ბიუროკრატიის ხელფასის, პრემიებისა და დანამატების ოდენობა.
"ერთიანი ნაციონალური მოძრაობა მოითხოვს", დავით სერგეენკომ პირადად განიხილოს წარმოდგენილი განცხადებები და მიიღოს გადაწყვეტილება სოციალურად დაუცველთა ბაზიდან ამოყრილი ოჯახებისთვის საარსებო შემწეობის აღდგენის შესახებ", - განაცხადა ზურაბ ჭიაბერაშვილმა.