საფრანგეთში გარდაცვლილი ქართველის სამშობლოში გადმოსვენება ვერ ხერხდება. 23 წლის გუგა ქუმსიკაშვილის ოჯახს გადმოსვენების ხარჯები არ აქვს. ოჯახმა დახმარება საფრანგეთში საქართველოს საელჩოს სთხოვა.
როგორც „ჯი-ეიჩ-ენს“ გარდაცვლილის დედამ განუცხადა, მათ დახმარებისთვის მიმართეს საფრანგეთში საქართველოს საელჩოსა და ადგილობრივ სოციალურ სამსახურს, თუმცა, ამ დრომდე, პასუხი არ აქვთ.
„ჯი-ეიჩ-ენს“ საქართველოს საგარეო საქმეთა სამინისტროში განუმარტეს, რომ საგარეო საქმეთა სამინისტრო, 2013 წლიდან მოქმედი კანონდებლოს საფუძველზე, ვერ უზრუნველყოფს აღნიშნულ პროცედურას.
„იმისათვის, რომ შესაძლებელი გახდეს დახმარება, ოჯახმა უნდა მიმართოს საქართველოს მთავრობას. ჩვენ კანონით ამ ფუნქციას ვერ ვახორციელებთ. თუ გარდაცვლილი, ან მისი ოჯახის წევრი იმყოფება სოციალურად დაუცველთა ბაზაში, მთავრობა იმსჯელებს საკითხზე და მიიღებს შესაბამის გადაწყვეტილებას“, - განუმარტეს „ჯი-ეიჩ-ენს“ საგარეო საქმეთა სამინისტროში.
გუგა ქუმსიკაშვილი სამი დღის წინ გარდაიცვალა. საფრანგეთის ჟანდარმერიის მიერ ოჯახისთვის გადაცემული საექსპერტო დასკვნის საფუძველზე, გარდაცვალების მიზეზი გულის უკმარისობა გახდა.
„ჯი-ეიჩ-ენის“ ინფორმაციით, ოჯახისათვის თანადგომის მიზნით საფრანგეთში მცხოვრებმა ქართველების მცირე ჯგუფმა ფულის შეგროვება დაიწყეს.