ფოთში სპეციალური კომისია ზარალის ოდენობის პარალელურად მის გამომწვევ მიზეზებს ამ დრომდე არკვევს. როგორც ”ჯი-ეიჩ-ენს” ფოთის მერის მოადგილემ ნიკოლოზ გრიგოლიამ განუცხადა, წერილების უმეტესობიდან ირკვევა, რომ ძირითადად დაზიანებულია სახლები, თუმცა წვიმის შედეგად მოხდა ეს, თუ სისტემატურად ჩადიოდა წყალი, ეს ჯერ არ იციან.
”ფოთში სტიქიით მიყენებულ ზარალს ითვლიან. კომისია უკვე მუშაობს, თუმცა ამ ეტაპზე ზარალის ოდენობა უცნობია. ასევე უცნობია, სტიქიის შედეგად რამდენი ოჯახი დაზარალდა. მიდის შემოსული წერილების განხილვა. ჩემი ინფორმაციით, დაზიანებულია სახლები, ჩამოსული წვიმის სედეგად. თუმცა მხოლოდ სტიქიის შედეგად მოხდა წყალის ჩამოსვლა, თუ სტაბილურად მოდიოდა არ ვიცი”, _ აცხადებს ნიკოლოზ გრიგოლია.
მისი განმარტებით, პრევენციული ზომების მიღების მიზნით, ფოთში დაიწყო სანიაღვრე არხების და სატუმბის დამატება.
,,ამჟამად ფოთში მხოლოდ 7 სატუმბია, რაც როგორც ჩანს სტიქიის დროს არასაკმარისი აღმოჩნდა. რეგიონალური განვითარების ფონდიდან გამოყოფილი თანხით, წელს სანიაღვრე არხები კეთდება. გაგრძელდება მომავალ წელსაც. ეს სამუშაოები რამდენიმე წლის განმავლობაში სტაბილურად უნდა გაგრძელდეს, რომ სრულად შეიქმნას სანიაღვრე არხების ქსელი, რაც ხელს შეუწყობს გამართულ მუშაობას და განსაკუთრებული ნალექის შემთხვევაში, მინიმალურ ზარალს მივიღებთ. მომავალ წელს დაემატება ერთი სატუმბი სადგური. რაც შეეხება სანიაღვრე არხებს, მომავალ წელს 16 კილომეტრიანი არხი გაკეთდება. ახლა მიმდინარეობს მუშაობა. გარდამავალი ტენდერია გამოცხადებული. ტენდერში გამარჯვებული კომპანიაა ”ალისა”. წელს დაფინანსება 800 000 -ია ლარია”, _ აცხადებს ფოთის მერის მოადგილე.
შეგახსენებთ, რომ ფოთში სტიქიის შედეგად სახლები და ასამდე ქუჩა დაზიანდა. მოსახლეობა მთავრობისაგან კომპენსაციებს და სანიაღვრე სისტემის მოწესრიგებას ითხოვს.