ვერეს ხეობაში გზაზე მოძრაობა სექტემბრის ბოლომდე მთლიანად აღდგება, - ამის შესახებ თბილისის მერი აცხადებს.
დავით ნარმანიას განცხადებით, შეთანხმებული გეგმის მიხედვით, გზის ერთი ნაწილი დაახლოებით 15 სექტემბრისთვის გაიხსნება, სექტემბრის ბოლომდე კი გზაზე მოძრაობა მთლიანად იქნება შესაძლებელი.
„სამუშაოები ძალიან ინტენსიურ რეჟიმში მიმდინარეობს, როგორც დღის, ასევე მთელი ღამის განმავლობაში, რათა დროულად იქნას დასრულებული ხიდის მშენებლობა, ასევე მიმდინარეობს გზების ჩაწყვეტილი და დაზიანებული მონაკვეთების აღდგენა. წყნეთის 13 ნომერთან გამორეცხილი მონაკვეთისთვის შენდება ძალიან დიდი საყრდენი კედელი, აქედან გამომდინარე სამუშაოების დასრულების შემდეგ ეს გზა მთლიანად უსაფრთხო იქნება“, - განაცხადა ნარმანიამ.
მერიის ინფორმაციით, უკვე დასრულებულია, გმირთა მოედნისა და თამარაშვილის ქუჩების დამაკავშირებელ გზაზე არსებული წყალგამტარი გვირაბების მონიტორინგი. გვირაბების ნაწილის რეაბილიტაცია რამდენიმე დღეში დაიწყება, მეორე ეტაპზე კი, დარჩენილი გვირაბები შეკეთდება. საავტომობილო გზის აღნიშნულ მონაკვეთზე, მდინარე ვერეზე სულ 7 გვირაბია აშენებული, აქედან 6 რეაბილიტაციას ექვემდებარება, მეშვიდე გვირაბის ნაცვლად კი ხიდის მშენებლობა მიმდინარეობს.
დავით ნარმანიამ, მერის მოადგილე გიორგი სოლომონიამ და მერიის კეთილმოწყობის საქალაქო სამსახურის უფროსმა ავთანდილ სუდაძემ დღეს, მდინარე ვერეს ხეობაში სტიქიის შედეგად დაზიანებული საგზაო ინფრასტრუქტურის აღდგენითი სამუშაოები დაათვალიერეს.
სარეაბილიტაციო სამუშაოებს კომპანიები „ბლექ სი გრუპი“ და „კავკასუს როუდ პროჯექტი“ აწარმოებენ. პროექტის საერთო ღირებულება 14.7 მლნ ლარია.
