სსტც „დელტას“ დირექტორის უჩა ძოძუაშვილის განცხადებით, გუშინ, კახეთში სტიქიის შეჩერება შეუძლებელი აღმოჩნდა. მისივე თქმით, პრევენციისთვის გასროლა ორი დღის წინ დაიწყო და სეტყვის საწინააღმდეგო დანადგარები გუშინაც ამოქმედებული იყო.
„50 მილიმეტრის მარცვლების ფიზიკური დაშლა, რომლებიც შემოვიდა კახეთის ტერიტორიაზე, შეუძლებელია. თუმცა, ჩვენ ამ პროცესის შესარბილებლად მაქსიმუმი გავაკეთეთ და მივაღწიეთ იმას, რომ არ მოხდა ამ მარცვლების ზომაში მნიშვნელოვანი ზრდა“, - განმარტავს ცენტრის ხელმძღვანელი.
სსსტც „დელტამ“კახეთის რეგიონში სამხრეთ-დასავლეთ მიმართულებიდან შემომავალი ღრუბლის ფრონტი ორი დღის წინ დააფიქსირა. მათი ინფორმაციით, ღრუბელი თავდაპირველად გავრცელდა საგარეჯოს ტერიტორიაზე, შემდეგ კი თელავის რაიონის სამხრეთ ნაწილსა და გურჯაანში.
კახეთში, გუშინ, გვიან ღამით, ძლიერმა სეტყვამ 2000 ჰექტარი ვენახი დააზიანა. განსაკუთრებით რთული მდგომარეობაა ახალსოფელში, სადაც ვენახები თითქმის მთლიანად განადგურდა. ადგილობრივები აცხადებენ, რომ სტიქიის შედეგად ისინი რამდენიმე ათასი ლარით დაზარალდნენ.
კახეთში სტიქიის სალიკვიდაციო სამუშაოები დაწყებულია.
