პოლონეთში საქართველოს ახალგაზრდა ელჩის ქეთევან ფრანგულაიშვილის ინიციატივითა და პოლონეთში საქართველოს ელჩის ნიკოლოზ ნიკოლოზიშვილის პატრონაჟით, ორგანიზაციამ „ხიდი საქართველოსთან“, 13 ივნისს სტიქიით დაზარალებულთა დასახმარებლად მოაწყო სხვადასხვა სახის საქველმოქმედო აქცია-კონცერტები და მოაგროვა თანხა, რომელიც შეადგენს ოცი ათას პოლონურ ზლოტს (დაახლ. თორმეტი ათას ლარს).
20 აგვისტოს სპორტისა და ახალგაზრდობის საქმეთა სამინისტროში გაიმართა შეხვედრა მინისტრ ტარიელ ხეჩიკაშვილთან და თბილისის მერის მოადგილე დიმიტრი ქუმსიაშვილთან, საქართველოს ახალგაზრდა ელჩმა პოლონეთში ქეთევან ფრანგულაიშვილმა სტუმრებს გააცნო ინფორმაცია განხორციელებული ღონისძიებების შესახებ და შეგროვილი თანხა 13 ივნისს სტიქიით დაზარალებულთა დახმარების ფონდს გადასცა.
https://www.youtube.com/watch?v=-b2jnvc6p04
შეგახსენებთ, რომ საქართველოს სპორტისა და ახალგაზრდობის საქმეთა სამინისტრო ახალგაზრდა ელჩების პროგრამას - „იყავი შენი ქვეყნის ახალგაზრდა ელჩი“ 10 ქვეყანაში ახორციელებს.
პროგრამის მიზანია საზღვარგარეთ მცხოვრები ქართველი ახალგაზრდების საშუალებით, მათი თანატოლი ქართველი და უცხოელი ახალგაზრდების ინფორმირება ჩვენი ქვეყნის ეკონომიკის, განათლების, კულტურის, სპორტის, ახალგაზრდული პოლიტიკისა და ისტორიის შესახებ.
საჯარო და კერძო სექტორის წარმომადგენლებისათვის, რომლებიც არიან ახალგაზრდების პოტენციურ დამსაქმებლები, შეიქმნება საზღვარგარეთ მცხოვრები საზოგადოებრივად აქტიური და მაღალი აკადემიური მოსწრების მქონე ახალგაზრდების ერთიანი ბაზა, რომლითაც მოხდება საქართველოში დამსაქმებლების დაინტერესება.
პროგრამის საშუალებით შერჩეულ ,,ახალგაზრდა ელჩებს" შესაძლებლობა მიეცემათ ერთწლიანი მანდატით გახდნენ საკუთარი ქვეყნის წარმომადგენლები ადგილსამყოფელ ქვეყანაში.
აღნიშნული თანხის შესაგროვებლად პოლონეთში ჩატარდა:
21 ივნისი – საქველმოქმედო კონცერტი და აუქციონი კრაკოვის ღვინის მარანში „კრაკო სლოუ ვაინს“. კონცერტში მონაწილეობა მიიღო ასოციაციაში არსებულმა ქართული ხალხური და სასულიერო მუსიკის შემსწავლელმა გუნდმა და ქალთა ცეკვის ანსამბლმა „ქართული“.აუქციონზე, სხვადასხვა ქართულ სუვენირთან ერთად გაიყიდა: ნიკა ბახიას 2010 წლის საფერავი, ანსამბლ ბასიანის ალბომი და თბილისში, სასტუმრო „ვილა ოპერაში“ 5 დღიანი დასვენება.
22 ივნისი – პრეზენტაცია საქართველოს შესახებ – მოგზაურთა კლუბი, კრაკოვი.
22 ივნისი – ტურისტული პრეზენტაცია საქართველოს შესახებ – კაფე ნიებოსტანი, ქ. ლოძი.
24 ივნისი – „საქართველოში მოგზაური პოლონელის მოგონებები“ – კლუბი „კორნეტი“, ქ. კრაკოვი.
26 ივნისი – მიხეილ კობახიძის 5 მოკლემეტრაჟიანი ფილმის ჩვენება – კინო–თეატრი „აგაფიკა“, ქ. კრაკოვი.
27 ივნისი – ბენდ „ტრანსკავკასიას“ კონცერტი ქ. ვარშავაში
28 ივნისი – ქ. კრაკოვის მთავარ მოედანზე კონცერტის მსვლელობისას შემოწირულობის შეგროვება, ქალაქ კრაკოვის მერიისა და კრაკოვში მცხოვრები ქართველი სტუდენტების დახარებით.
10–13 ივლისი – ფესტივალი „სხვადასხვა ხმა“ – ქ. ლუბლინი.
გარდა ჩამოთვლილი ღონისძიებებისა, დაიდგა შემოწირულობის ყუთები ქალაქ კრაკოვში: ღვინის მაღაზიაში „კრაკო სლოუ ვაინს“ და კაფეში „კავკასია“. ქალაქ ვროცლავში – რესტორანში „უ გრუზინა“ და ქალაქ ვარშავაში რესტორანში „ზიელონი ნიედვიეძ“
აღსანიშნავია ის ფაქტიც, რომ პოლონელების მიერ შემოწირულობის შეგროვების მიზნით სოციალურ ქსელ „ფეისბუქში”შეიქმნა გვერდი „ეიდ თუ თბილისი“, სადაც პოლონელები იწვევდნენ მეგობრებს სტიქიით დაზარალებულთა დასახმარებლად.
