ურეკში, გრიგოლეთში, მაღალმთიან აჭარაში ინფრასტრუქტურული პრობლემები არსებობს. როგორც ”ჯი-ეიჩ-ენს” ადგილობრივებთან ერთად, სასტუმროს მფლობელებმა განუცხადეს, კურორტებზე წყალგაყვანილობა, გაზი, საკანალიზაციო მილები არ არის გაყვანილი.
ურეკში არცერთ ქუჩაზე, ექვთიმე თაყაიშვილის ქუჩის გარდა გზა დაგებული არაა. მაღალმთიანი აჭარის შემთხვევაში არც ნაგვის ურნები არსებობს. ნარჩენების გასატანად სპეციალური სამსახურიც არ ჰყავთ. სწორედ ამიტომ მოსახლეობა ნაგავს ხევებში ყრის, რაც მდინარეებში ხვდება და წყალი ბინძურდება.
”ნაწილობრივ გადაიჭრა გზის პრობლემა, თუმცა სრულად ვერა. გარკვეულ მონაკვეთზე გასაკეთებელია, ჩამოსული სტუმრები საკუთარი ავტომობილით სოფლამდე ძლივს მიდიან და იძულებულნი არიან სპეციალური სამარშრუტო ტაქსი დაიქირაონ და ისე მიაღწიონ დანიშნულ ადგილამდე. აჭარის ყველა სოფელში მძიმე მდგომარეობაა ინფრასტრუქტურის მხრივ”, _ აცხადებს ქედის რაიონში მდებარე საოჯახო სასტუმროს მფლობელის ზებურ ბოლქვაძე.
ურეკში მდებარე სასტუმრო ”ედემის” მფლობელის ამირან კიღურაძის განმარტებით, ურეკს არ გააჩნია ცენტრალური წყალმომარაგება, გაზი და კანალიზაცია, რამაც შესაძლოა ეპიდემიური აფეთქება გამოიწვიოს. გარდა ამისა, არცერთ ქუჩაზე, ექვთიმე თაყაიშვილის ქუჩის გარდა არ არის გზა დაგებული.
ინფრასტრუქტურულ პრობლემებს უჩივის გრიგოლეთში მდებარე სასტუმროს ”ვილა რეტას” მფლობელი რეზო ხონელიძეც.
”პლაჟი დანაგვიანებულია, კანალიზაცია, წყალგაყვანილობა საერთოდ არ არსებობს, მოსახლეობას ჭები აქვს ამოთხრილი”,- აცხადებს ხონელიძე.
