აღმაშენებლის ხეივნიდან მუხათგვერდისკენ გადასასვლელ ესტაკადაზე დასრულდა რკინა-ბეტონის თვალამრიდების მონტაჟი და ჰიდროსაიზოლაციო სამუშაოები, სავალი ნაწილის ფენილის დაშლა და საყრდენი კედლის დემონტაჟი.
ესტაკადის რეაბილიტაციის ფარგლებში განხორციელდება შემდეგი სამუშაოები:
გაძლიერდება არსებული ხიდის განაპირა ბურჯები, ხიდის ძირითადი კონსტრუქცია, მოეწყობა ახალი სავალი ნაწილი, შემასწორებელი ფენა, ჰიდროიზოლაცია და არმირებული ბეტონის დამცავი ფენა. გზაგამტარის საექსპლუატაციო ვადის გახანგრძლივებისთვის მოეწყობა სპეციალური წვრილმარცვლოვანი ცხელი ასფალტო-ბეტონის ფენა (სისქე 5სმ).
პროექტით გათვალისწინებულია არსებული განათების ელ-მომარაგების ხაზების გადატანა, ასევე ახალი განათების ქსელის მოწყობა ხიდისა და პანდუსებისთვის და მიმდებარე გზებისთვის.
პროექტის ფარგლებში ხიდზე არსებული (ძველი) მოაჯირები შეიცვლება ახალი, თუჯის მოაჯირებით.
ესტაკადის რეაბილიტაციისა და პანდუსების აღდგენის შემდეგ მოხდება მისასვლელი და მიმდებარე გზების აღდგენა-რეაბილიტაცია.
სარეაბილიტაციო სამუშაოებს შ.პ.ს სამშენებლო კომერციული კორპორაცია „ხიდი“ ასრულებს. პროექტის საერთო ღირებულება 2.188.965 მლნ ლარს შეადგენს. სამუშაოები მიმდინარე წლის 6 მაისს დაიწყო და 210 დღეში დასრულდება.
აღმაშენებლის ხეივნიდან მუხათგვერდისკენ გადასასვლელი ესტაკადა გასული საუკუნის სამოცდაათიან წლებში აშენდა, ფუნქციონირება მალევე შეწყვიტა და მას შემდეგ რეაბილიტაცია არ ჩატარებია.