რუსეთ-საქართველოს 2008 წლის ომის შვიდი წლისთავთან დაკავშირებით, ეგვიპტეში საქართველოს საელჩოს ორგანიზებით ფოტო-გამოფენა გაიმართა, რომლის ფარგლებშიც ელჩი არჩილ ძულიაშვილი ადგილობრივი მედიის წარმომადგენლებს შეხვდა. მან ჟურნალისტებს ინფორმაცია მიაწოდა, როგორც 2008 წლის ომის, ასევე 1990-იანი წლების კონფლიქტების შესახებ. ელჩმა ხაზი გაუსვა საქართველოს ოკუპირებულ რეგიონებში ომის შედეგად შექმნილ მძიმე პოლიტიკურ, ჰუმანიტარული მდგომარეობას და ყურადღება გაამახვილა რუსეთის ფედერაციის მხრიდან 2008 წლის 12 აგვისტოს ცეცხლის შეწყვეტის შეთანხმების პერმანენტული დარღვევისა და საქართველოს ტერიტორიების მცოცავი ანექსიის პოლიტიკაზე.
პრეს-კონფერენციის დასასრულს სტუმრებს ფოტო გამოფენის დათვალიერების საშუალება მიეცათ. გამოფენაზე სახელწოდებით „A Story of Internal Displacement Captures on Camera” წარმოდგენილი იყო 1990-იანი წლების კონფლიქტის, 2008 წლის ომისა და ე.წ. „ბორდერიზაციის“ პროცესის ამსახველი ფოტოები.
ქ. კაიროში მდებარე საქართველოს საელჩოში გამართულ ღონისძიებას ეგვიპტის მედიის წარმომადგენლები, წამყვანი ეგვიპტური გაზეთებისა და ელექტრონული გამოცემების, რადიოსა და ტელევიზიის ჟურნალისტები დაესწრნენ. აღსანიშნავია, რომ 2008 წლის რუსეთ-საქართველოს ომის შვიდი წლისთავთან დაკავშირებული შეხვედრა ეგვიპტურ მედიაში ფართოდ გაშუქდა.
