13-14 ივნისს მომხდარი სტიქიის დროს დაზიანებულ წყნეთი-ბეთანიის გზაზე სტიქიის სალიკვიდაციო, მდინარე ვერეს ხეობისა და მიმდებარე ტერიტორიის მდგომარეობის შესწავლისა და შემდგომი აღდგენითი სამუშაოების ორგანიზების მიზნით შექმნილი უწყებათაშორისი კომისიის მორიგი სხდომა გაიმართა. სხდომას თბილისის მერი დავით ნარმანია, ვიცე-მერი დიმიტრი ქუმსიშვილი და მთავრობის სხვა წარმომადგენლები ესწრებოდნენ. კომისიის წევრებმა დამეწყრილი ტერიტორია დაათვალიერეს და გაწმენდით სამუშაოებზე იმსჯელეს.
დედაქალაქის მერიის ინფორმაციით, უწყებათაშორისი კომისიის სხდომაზე მთავრობის წარმომადგენლებმა სტიქიის შედეგად დაზარალებულ პირებთან მიმართებით განხორციელებული ღონისძიებების შესახებ ქალაქ თბილისის მერიის ანგარიში მოისმინეს. გარდა ამისა, კომისიის სხდომაზე განიხილეს ახალი ტერიტორიების განსაზღვრა, რომლის ფარგლებშიც არსებული დანგრეული და დაზიანებული საცხოვრებელი სახლების მფლობელები მიჩნეულ იქნებიან დაზარალებულ პირებად.
თბილისის მერის დავით ნარმანიას განცხადებით, აქტიურად მიმდინარეობს მოსახლეობისთვის ზიანის ანაზღაურების პროცესი და დაზიანებული ინფრასტრუქტურის აღდგენითი სამუშაოები, ახლა კი პრიორიტეტი უკვე დამეწყრილი ტერიტორიის გაწმენდვითი სამუშაოებია.
„მივიღეთ გადაწყვეტილება და საქართველოს მთავრობის მიერ მოხდება დამატებით დაფინანსების გამოყოფა, რასაც ფინანსთა სამინისტრო ადასტურებს. დავიწყებთ გაწმენდით სამუშაოებს, რათა შემოდგომი მასიური წვიმების დროს არ მივიღოთ კატასტროფული მდგომარეობა, ისევ არ ჩამოწვეს მეწყერი , არ გადაიკეტოს გზები და არ მოხდეს წყლის დაგუბება. ჩვენ მომდევნო კვირისთვის უკვე გვექნება წინა საპროექტო გადაწყვეტილება, დასკვნა, რომელიც არის წარმოდგენილი გარემოს დაცვის სამინისტროს მიერ. ამ დასკვნის საფუძველზე გავაკეთებთ დაინტერესებული კომპანიების მოწვევას და რომელიც ყველაზე საუკეთესო პირობებს შემოგვთავაზებს, მასთან გაფორმებული კონტრაქტის საფუძველზე დავიწყებთ ინტენსიურ სამუშაოებს. ეს არის წყნეთი-სამადლოს გზის ტერიტორია, ერთის მხრივ და მეორეს მხრივ, ეს არის წყნეთიდან ქვევით ჩამავალი გზა, სადაც უნდა მოხდეს გაწმენდითი სამუშაოები, უნდა დამუშავდეს ხე-ტყე , რომელიც არის დაძრული და გაჩერებული, ასევე ამ პროცესების შედეგად ხელოვნურად წარმოშობილი ტბა უნდა დავაშროთ, გადასატანია მაღალი ძაბვის ბოძი, შედეგად ეს ტერიტორია გახდება გაცილებით უსაფრთხო“,- განაცხადა დავით ნარმანიამ.
ფინანსთა მინისტრის ნოდარ ხადურის განცხადებით, ამ დროისთვის ანგარიშზე არსებული 2,7 მლნ ლარი თბილისის მერიის ბიუჯეტში უახლოეს დღეებში გადაირიცხება. ,,რამდენიმე დონორთან ვმუშაობთ, რათა მოვიზიდოთ დამატებითი ინფრასტრუქტურული დაფინანსება, რომელიც მოხმარდება როგორც თბილისში გზების რეაბილიტაციას, ასევე კონკრეტულად ამ მონაკვეთს, რომელზეც მდგომარეობა საკმაოდ მძიმეა”,- განაცხადა ფინანსთა მინისტრმა ნოდარ ხადურმა.
სხდომაზე, სტიქიასთან დაკავშირებით, საქართველოს გარემოს დაცვისა და ბუნებრივი რესურსების სამინისტროს ანგარიშსაც მოუსმინეს. კომისიის წევრებმა სტიქიური უბედურების ზონის დადგენის მიზნით ჩატარებულ კვლევებთან დაკავშირებითაც იმსჯელეს.
13-14 ივნისს მომხდარი სტიქიის სალიკვიდაციო და მდინარე ვერეს ხეობისა და
მიმდებარე ტერიტორიის მდგომარეობის შესწავლისა და შემდგომი აღდგენითი
სამუშაოების ორგანიზების მიზნით შექმნილი უწყებათაშორისი კომისია 19
ივნისს შეიქმნა.