რელიგიის საკითხთა სახელმწიფო სააგენტოსა და რამდენიმე არასამთავრობო ორგანიზაციას შორის თანამშრომლობის შესახებ მემორანდუმი გაფორმდა.
რელიგიის საკითხთა სახელმწიფო სააგენტოს ცნობით, მემორანდუმი შემდეგ არასამთავრობო ორგანიზაციებთან გააფორმა - "საზოგადოებრივი დამცველი" (აღმასრულებელი დირექტორი დემეტრე ლომაძე), "თავისუფალი არჩევანი" (თავმჯდომარე მანანა ბიწაძე-მიქელაძე), "ასოციაცია: კავკასიის ქალები საუნივერსიტეტო განათლებით" (პრეზიდენტი თამარ კიკნაძე) და "სრულიად საქართველოს სახალხო დარბაზი (თავმჯდომარე გოდერძი ოთარაშვილი).
"მემორანდუმში აღნიშნულია, რომ რელიგიის საკითხთა სახელმწიფო სააგენტოსთან უნდა ჩამოყალიბდეს ურთიერთაღიარებაზე დამყარებული კონსტრუქციული და საზოგადოებრივ ინტერესებზე ორიენტირებული მჭიდრო თანამშრომლობა. მემორანდუმის ფარგლებში, არასამთავრობო ორგანიზაციები კვალიფიციურ, პერმანენტულ და კომპლექსურ მონიტორინგს გაუწევენ რელიგიის სფეროში განხორციელებულ სახელწიფო პოლიტიკას; საჭიროების შემთხვევაში, მოამზადებენ დასაბუთებულ შენიშვნებსა და რეკომენდაციებს, შექმნიან მუდმივმოქმედ საკოორდინაციო საბჭოს, რომელიც შეიმუშავებს რეკომენდაციებს, ასევე პრობლემათა დაძლევაზე ორიენტირებულ მოსაზრებებსა და წინადადებებს", - ნათქვამია განცხადებაში.