კრწანისის გამგებელმა გიორგი კოპალეიშვილმა, ბაგა-ბაღების მართვის სააგენტოს ხელმძღვანელმა თემურ თორდინავამ და საკრებულოს დეპუტატმა ბექა ნაცვლიშვილმა კრწანისის რაიონის ზემო ფონიჭალის დასახლებაში, წლების წინ დახურული #206 საბავშვო ბაგა-ბაღის სარემონტო-სარეკონსტრუქციო სამუშაოები დაათვალიერეს.
სამშენებლო სამუშაოები 20 ივლისს დაიწყო, რომლის დასრულების შემდეგ შეიქმნება აღსაზრდელთა 8 ჯგუფი, მთლიანობაში კი, ბაგა-ბაღი 300-მდე ბავშვის სკოლამდელი განათლებით უზრუნველყოფას შეძლებს.
წლების წინ საბავშვო ბაგა-ბაღი ორი ფლიგელისგან შედგებოდა, რომლებიც ერთმანეთს ხიდით უკავშირდებოდა. 2006 წელს ბაგა-ბაღი დაიხურა, მისი ერთი ნაწილი იჯარით გაიცა, ხოლო მეორე ნაწილი წლების განმავლობაში უფუნქციოდ იყო. 2015 წელს ბაგა-ბაღების მართვის სააგენტოს მიერ მოხდა დარჩენილი 1300 მ2 ფართის ხელახალი დაგეგმარება, რის შემდეგაც სარეკონსტრუქციო სამუშაოები დაიწყო.
„გაუქმებული ბაღებიდან ეს არის რიგით მესამე საბავშვო ბაგა-ბაღი, რომლის აღდგენაც დავიწყეთ. მოგეხსენებათ, რომ წინა წლებში თბილისში რამდენიმე ათეულმა ბაგა-ბაღმა შეწყვიტა ფუნქციონირება, რამაც ადგილების დეფიციტი და სააღმზრდელო ჯგუფების გადატვირთვა გამოიწვია. ახალი ბაღების აშენებითა და ამ ბაღების აღდგენით გარეთ დარჩენილი ბავშვების მიღებას და გადატვირთული ჯგუფების განიტვირთვას შევძლებთ“. - განაცხადა ბაგა-ბაღების მართვის სააგენტოს ხელმძღვანელმა თემურ თორდინავამ.
„ჩვენი რაიონისთვის ძალიან მნიშვნელოვანია ამ ბაღის აღდგენა, რადგან კრწანისში საკმაოდ დიდი მოთხოვნაა საბავშვო ბაღზე. რამდენიმე თვეში ჩვენს პატარებს თანამედროვე სტანდარტების ბაღი ექნებათ“, - განაცხადა კრწანისის გამგებელმა გიორგი კოპალეიშვილმა.
საბავშვო ბაგა-ბაღი ექსპლუატაციაში მომავალ წლის დასაწყისში შევა. სარემონტო-სარეკონსტრუქციო სამუშაოებს ტენდერში გამარჯვებული კომპანია ,,ბრენდ სტაილი’’ აწარმოებს. ბაღის აღსადგენად თბილისის ბიუჯეტიდან 532 599 ლარია გამოყოფილი.
