საქართველოს რეგიონული განვითარებისა და ინფრასტრუქტურის სამინისტროს მართვაში არსებულმა კომპანიამ „თეთნულდ დეველოპმენტმა“ სვანეთში, თეთნულდის მთაზე ჟურნალისტებისთვის და საქართველოში შემომყვანი ტურისტული კომპანიებისთვის საინფორმაციო ტური მოაწყო. მედიატურის მონაწილეებს საქართველოს რეგიონული განვითარებისა და ინფრასტრუქტურის მინისტრის მოადგილემ ეკა სეფაშვილმა და კომპანია „თეთნულდ დეველოპმენტის“ დირექტორმა უკა კილაძემ უმასპინძლეს. ჟურნალისტებმა და ტურისტული კომპანიის წარმომადგენლებმა ტურისტული ინფრასტრუქტურა და მიმდინარე სამუშაოები დაათვალიერეს, ასევე გაეცნენ კურორტის განვითარების პერსპექტივებს.
შპს „თეთნულდი დეველოპმენტი” საქართველოს რეგიონული განვითარებისა და ინფრასტრუქტურის სამინისტროს მართვაში არსებული კომპანიაა, რომელიც სვანეთში სამთო კურორტს აშენებს. პროექტის პირველი ეტაპის ღირებულება 40 მილიონ ევროს შეადგენს და ის საქართველოს მთავრობის მიერ ფინანსდება.
მსოფლიო დონის სათხილამურო კურორტის მშენებლობა მესტიაში აქტიურად მიმდინარეობს. საკურორტო ტერიტორია 7000 ჰა-ს მოიცავს და აქედან 4500 ჰა მთის სათხილამურო ტერიტორიას წარმოადგენს. კურორტზე ამიერკავკასიაში ყველაზე გრძელი (9,5 კმ-იანი) და ყველაზე დიდი ვერტიკალური ვარდნის მქონე (1,7კმ) სასრიალო ტრასები მოეწყობა.
სამთო კურორტზე 5 საბაგირო გზის მშენებლობაა დაგეგმილი. სასრიალო ტრასების მთლიანი საერთო სიგრძე 169 კმ-ს შეადგენს (მიმდინარე ეტაპი 25კმ), საბაგიროების საერთო რაოდენობა 20-22 ერთეულია (მიმდინარე ეტაპი 5 ერთეული). უმაღლესი სასრიალო წერტილი ზღვის დონიდან 3600 მეტრზეა, ყველაზე დაბალი კი 1600 მეტრზე. არსებული გათვლებით, თეთნულდის ტრასებზე ერთდროულად მოსრიალეთა რაოდენობა 4100 ადამიანია, საბაგიროების საერთო საათობრივი გამტარუნარიანობა - 8400 ადამიანი საათში.
სათხილამურო-საბაგირო ინფრასტრუქტურის მოწოდებას ფრანგული კომპანია “Pomagalski“-ი უზრუნველყოფს. საბაგიროების მონტაჟს ახორციელებს ავსტრიული კომპანია “RMS”. კურორტის საზეიმო გახსნა მიმდინარე წლის 15 დეკემბერსაა დაგეგმილი. თეთნულდი წელიწადის 4 სეზონზე მოემსახურება დამსვენებელს, აქედან სასრიალო პერიოდი წელიწადში - 6-7თვეა. კურორტ „თეთნულდის“ მშენებლობა სვანეთის ტურისტული პოტენციალის მაქსიმალურ ათვისებასა ქვეყანაში ტურიზმის განვითარებას შეუწყობს ხელს.