"რუსთავი 2" ვერ დაიხურება, ჩვენ არ გავჩერდებით," - ამის შესახებ განცხადება ტელეკომპანიის დირექტორმა ნიკა გვარამიამ დღეს სპეციალურ ბრიფინგზე გააკეთა. მისი თქმით, დაყადაღებული ქონება ქიბარ ხალვაშს არ ეკუთვნის.
,,ცინიკური და ბედის ირონიაა, იმიტომ რომ ეს ის ქონებაა, რომელიც ქიბარ ხალვაშის დროს არ არსებობდა, ეს არის ბოლო 3 წლის განმავლობაში შეძენილი და რომელიც შემოიტანა შპს "საქრთველომ", რომელმაც გააორმაგა ტელევიზიის შემოსავალი," - განაცხადა გვარამიამ. იგი მოსამართლეს მედიის თავისუფლების შეზღუდვაში ადანაშაულებს და მას ,,ზონდერს” უწოდებს.
,,ზონდერ მოსამართლე ურთმელიძე, რომელმაც ეს გადაწყვეტილება მიიღო ე.წ. წულუკიანის მოსამართლეთა ჯგუფს მიეკუთვნება, რომელიც 2012 წელს შეიქმნა” - აცხადებს გვარამია.
იგი ,,რუსთავი 2" განჩინებას გაასაჩივრებს და მოსამართლის აცილებას ითხოვს. ასევე ამბობს, რომ განხილვა უნდა მოეწყოს სამი მოსამართლის მონაწილეობით ზეპირი განხილვით, ვინაიდან არის საზოგადოების დიდი ინტერესი. "რუსთავი 2" ვერ დაიხურება, ჩვენ არ გავჩერდებით," - განაცხადა ნიკა გვარამიამ.
შეგახსენებთ, საქალაქო სასამართლოს 5 აგვისტოს გადაწყვეტილებით რუსთავი 2-ის ქონება სრულად დაყადაღებულია. ყადაღა დაედო შპს სამაუწყებლო კომპანია რუსთავი 2-ის მფლობელთა წილებს. არხის მეწილეებს აკერძალათ ტელეკომპანიის სახელით ვალდებულებების აღება, რეორგანიზაცია, წესდებაში ცვლილებების შეტანა, საზოაგდოების საკუთრებაში არსებული ქონების განკარგვა.
ასევე დაყადაღებულია რუსთავი 2-ის სახელზე გაფორმებულ ქონება, კერძოდ, სანდრო ეულის ქუჩაზე მდებარე შენობა-ნაგებობები.
რუსთავი 2-ს საბოლოო დავის დასრულებამდე ეკრძალება მოძრავი ნივთების, მათ შორის ტელე-რადიო სიხშირის გადამცემი მოწყობილობების, გენერატორების, ავტომობილების გასხვისება და გაქირავება. ამ ქონების ნებისმიერი სახით უფლებრივად დატვირთვა.
სასამართლომ გადაწყვეტილება ქიბარ ხალვაშის სარჩელის საფუძველზე მიიღო. თუმცა - არ დააკმაყოფილა მოსარჩელეთა მოთხოვნა რუსთავი 2-ის ლოგოს გამოყენების აკრძალვის შესახებ. ასევე სასამართლომ არ განიხილა არხის საბანკო ანგარიშებზე ყადაღის დადების საკითხი.
შეგახსენებთ არხის მფლობელები არიან: ლევან ყარამანიშვილი - 23 პროცენტი, გიორგი ყარამანიშვილი 18 პროცენტი, ტელეკომპანია საქართველო - 51 პროცენტი და ნინო ნიჟარაძე - 9 პროცენტი.
