თბილისის მუნიციპალიტეტის საკრებულოს იურიდიულ საკითხთა კომისიის თავმჯდომარე - თევდორე კობახიძე, საკრებულოს დიმიტრი ყიფიანის სახელობის სხდომათა დარბაზში, ისნის რაიონის მოსახლეობას შეხვდა.
სამუშაო შეხვედრას ისნის რაიონის მაჟორიტარ დეპუტატი - ზურაბ ნეფარიძე, მერიის კეთილმოწყობის სამსახურის უფროსის მოადგილე ზურაბ მურჯიკნელი, ისნის რაიონის გამგებლის მოადგილე თემურ ჩიჩუა, კომპანია „Georgian Water and Power“-ის ტექნიკური დირექტორის მოადგილე ომარ გოცირიძე, ჩოლოყაშვილის ქუჩისა და ნავთლუღ-კახეთის რკინიგზის სახლის მცხოვრებლები ესწრებოდნენ.
შეხვედრაზე, რომელსაც საკრებულოს იურიდიული კომისიის თავმჯდომარე თევდორე კობახიძე უძღვებოდა, რაიონის მაჟორიტარმა დეპუტატმა ზურაბ ნეფარიძემ დამსწრე საზოგადობას ჩოლოყაშვილის ქუჩაზე მდებარე დევნილების კორპუსისა და ნავთლუღ-კახეთის კრინიგზის სახლის მცხოვრებლების პრობლემა დეტალურად გააცნო, კანალიზაციის სისტემის მოუწესრიგებლობაზე და ამის შედეგად გამოწვეულ პრობლემებზე ისაუბრა.
საკითხის მოგვარების გზებზე მსჯელობისას, აზრი მოსახლეობის, გამგეობის, მერიისა და კომპანია „Georgian Water and Power“-ის წარმომადგენლებმა გამოთქვეს.
შეხვედრის დასასრულს მიღებული გადაწყვეტილებით, მომდევნო კვირას, ჩოლოყაშვილის ქუჩაზე მდებარე დევნილების კორპუსისა და ნავთლუღ-კახეთის რკინიგზის სახლის მცხოვრებლების წინაშე მდგარი ამ კონკრეტული პრობლემის გადასაჭრელად სამუშაო ჯგუფი შეიქმნება.
„სამუშაო შეხვედრა იმ პრობლემის მოსაგვარებლად გაიმართა, რომელიც ისნის რაიონის მოსახლეობას აწუხებს. სიტუაციის უკეთ გასაცნობად პირადად ვიმყოფებოდი ჩოლოყაშვილის ქუჩაზე მდებარე კორპუსსა და ნავთლუღ-კახეთის რკინიგზის სახლში და მცხოვრები ჩვენი თანამოქალაქეების ყოფის პირობებს გავეცანი. აღვნიშნავ, რომ ორივე სახლში დევნილები არიან ჩასახლებულნი.
დღევამდელ სამუშაო შეხვერაზე მიღებული გადაწყვეტილებით, მომდევნო კვირას, აღნიშნულ საკითხთან დაკავშირებით შეიქმნება სამუშაო ჯგუფი, რომელიც საკითხს არა მხოლოდ ისნის რაიონის, არამედ დედაქალაქის მასშტაბით შეისწავლის. შედგება სამოქმედო გეგმა, გაკეთდება ფინანსური დასკვნები თუ რა რაოდენობის თანხა იქნება საჭირო ამ პრობლემის აღმოსაფხვრელად და დასახელდება კონკრეტული ვადები, რომელთა ფარგლებშიც, ეტაპობრივად დედაქალაქის მასშტაბით ამ საკითხის გადაწყვეტას შევძლებთ.
სამუშაო ჯგუფში საკრებულოს იურიდიული კომისიის წარმომადგენლები, მაჟორიტარი დეპუტატი, დედაქალაქის მერიის, გამგეობის, კომპანია Georgian Water and Power“-ის წარმომადგენლები და დამოუკიდებელი ექსპერტები შევლენ“, - განაცხადა თევდორე კობახიძემ შეხვედრის დასასრულს.
