სამარშრუტო ტაქსების მძღოლებს ობიექტური მიზეზებით წარმოშობილ ძველ ვალებს ჩამოაწერენ, - ამის შესახებ ჟურნალისტებს "თბილისის მიკროავტობუსის" წარმომადგენლებსა და გაფიცული მძღოლების საინიციატივო ჯგუფის შეხვედრის შემდეგ, კომპანიის წარმომადგენელმა ნათია მიქიაშვილმა განუცხადა.
,,არსებობს სუბიექტური და ობიექტური მიზეზებით წარმოშობილი ვალი. ობიექტურ მიზეზებს შორის არის ოლიმპიადის დროს გზის გადაკეტვა, სტიქიის დროს მგზავრთა რაოდენობის შემცირება. ამ დღეებიდან გამოწვეული ვალების ჩამოწერა მოხდება. ასევე, როდესაც ფუჭდება ავტომობილი, როდესაც არის ტექნიკური პრობლემა და არის გაჩერებული უფრო მეტი დღის განმავლობაში, რა თქმა უნდა, ასევე მოხდება ამ ვალის ჩამოწერა. ეს აქამდეც ასე იყო, მაგრამ ამას მიეცემა ოფიციალური სახე", - განმარტა მიქიაშვილმა.
მისივე თქმით, ყოველდღიური გეგმა ისედაც გადასულია ზაფხულის რეჟიმზე, როგორც ეს ყოველწლიურად ხდება, თუმცა დღევანდელ შეხვედრაზე მოხდა ყველა სადაო საკითხის დაზუსტება.
მიქიაშვილის განხცადებით, კომპანია შეხვედრის შედეგებს გააცნობს ავტოპარკში შეკრებილ გაფიცულ მძღოლებს და სამარშრუტო ტაქსების მძღოლები სამუშაო ადგილებს სავარაუდოდ ხვალ დილამდე დაუბრუნდებიან.