დევნილები "ოლიმპიურ სოფელში" ბინების მიღებას ოქტომბრის ბოლომდე შეძლებენ, - ამის შესახებ ოკუპირებული ტერიტორიებიდან იძულებით გადაადგილებულ პირთა განსახლებისა და ლტოლვილთა მინისტრმა განაცხადა. სოზარ სუბარის განმარტებით, ოლიმპიური სოფელი დევნილების ჩასახლებისთვის, წესით სექტემბერში უნდა ჩაბარდეს, თუმცა მისი თქმით, სამშენებლო კომპანიამ გარკვეული დრო ითხოვა.
,,გარკვეული დრო სჭირდება თავად კომპანიას, რომ შიდა სივრცე მოაწესრიგოს და დევნილთა საჭიროებებს მოარგოს, ვინაიდან ოლიმპიადისთვის სხვაგვარად იყო დაპროექტებული. იგივე ტიხრები აბსოლუტურად სხვა სისტემითაა გაკეთებული, ხოლო სხვა სისტემით იქნება დევნილებისთვის. ასე რომ, ბინების გადაცემა წესით სექტემბრიდან უნდა დაიწყოს, თუმცა ეს პროცესი შეიძლება გაჭიანურდეს, თუ თავად "ჰუალინგ ჯგუფი" ვერ მოასწრებს კორპუსების ვადაში ჩაბარებას. კომპანიას აქვს თხოვნა, რომ თუ დასჭირდათ, ჩაბარების პროცესმა 2-3 კვირით გადაიწიოს. ყოველშემთხვევაში ეს არ იქნება ოქტომბერზე გვიან”, - აცხადებს მინისტრი ინტერპრესნიუსთან ინტერვიუში.
მისივე თქმით, პირველ ეტაპზე დევნილებზე გაიცემა 298 ბინა, თუმცა, გარდა ამისა, საუბარია ამავე ტერიტორიაზე მდებარე კიდევ 300 ბინაზე, რომელიც მომავალი წლის დასაწყისში უნდა ჩაბარდეს.
შეგახსენებთ, დევნილთა სამინისტრომ ბინების გაცემასთან დაკავშირებით, დევნილთათვის მინიჭებული ქულები უკვე გამოაქვეყნა. დევნილებს პრეტენზიების გამოსახატად და ხარვეზების გამოსასწორებლად 3 კვირიანი ვადა მიეცათ, რომელიც14 აგვისტოს იწურება. მინისტრის განცხადებით, ამის შემდეგ ისევ განხორციელდება მონიტორინგი.
,,14 აგვისტოდან დაიწყება მონიტორინგი. მაგალითად, როცა ადამიანი წერს, რომ აქვს მძიმე საცხოვრებელი პირობები და ამაში ითხოვს ქულას, ჩვენ მივდივართ და ადგილზე ვამოწმებთ მართლა ასეა თუ არ, ქირას იხდის თუ არა, ნგრევადია ობიექტი თუ არა და ა.შ. ასევე საჯარო რეესტრში ვამოწმებთ, აქვს თუ არა კონკრეტულ ოჯახს ქონება, ხშირ შემთხვევაში პოლიციასაც ვთხოვთ დახმარებას და უამრავი ისეთი ნიუანსია, რომელიც უნდა გადამოწმდეს. უკვე ამის შემდეგ იკრიბება ბინების გამანაწილებელი კომისია, რომელიც იღებს გადაწყვეტილებებს”, - განმარტავს მინისტრი.
