4 აგვისტოს, ყვარლის რაიონულ ჰოსპიტალში 18:30 წუთიდან მოსახლეობის ინტენსიური დინება დაიწყო, ჩივილებით გულის რევა, ღებინება, დიარეა და მკვეთრი ტემპერატურული რეაქცია. 5 აგვისტოს გამთენიისას სამედიცინო ცენტრში ჰოსპიტალიზირებული იქნა 37 პაციენტი ასაკით 1 – 8 წლამდე. მათ კლინიკურ–დიაგნოსტიკური გამოკვლევები და შესაბამისი დეზინტოქსიკაციური თერაპია ჩაუტარდათ. მოსახლეობის მაღალი მომართვიანობიდან გამომდინარე აღებული იქნა ლაბორატორიული სინჯებიც.
მიმდინარე მონაცემებით ყვარლის რაიონულმა ჰოსპიტალმა 80 პაციენტის ჰოსპიტალიზაცია განახორციელა, აქედან 48 პაციენტის მდგომარეობა დამაკმაყოფილებელია და გაწერილია ბინაზე, 32 პაციენტი კი ყვარლის რაიონულ ჰოსპიტალში განაგრძობს მკურნალობას, მათი მდგომარეობა ამ დროისათვის სტაბილურია.
დღის მეორე ნახევრიდან სამედიცინო ცენტრში პაციენტების ნაკადის შემოდინებამ იკლო.
