ბერნში, საქართველოს საელჩოში, შვეიცარიის კონფედერაციაში საქართველოს ელჩმა ირაკლი ყურაშვილმა საქართველოში შვეიცარიის კონფედერაციის ახალ ელჩს ლუკას ბეგლინგერს უმასპინძლა. გაცნობითი ხასიათის შეხვედრაზე ელჩებმა განიხილეს ორმხრივი ურთიერთობების მნიშვნელოვანი საკითხები, უკვე განხორციელებული მაღალი დონის ორმხრივი ვიზიტები და სამომავლო საქმიანობა. სამომავლო საქმიანობის პრიორიტეტებს შორის დასახელდა ეკონომიკის, სოფლის მეურნეობისა და ტურიზმის სფეროებში თანამშრომლობის განვითარება. ირაკლი ყურაშვილმა და ლუკას ბეგლინგერმა აგრეთვე განიხილეს შვეიცარიული კანტონებისა და საქართველოს რეგიონების დამეგობრების საკითხი.
საქართველოში შვეიცარიის კონფედერაციის ახალი ელჩი აღნიშნულ პოზიციამდე პოლონეთში შვეიცარიის დიპლომატიურ წარმომადგენლობას ხელმძღვანელობდა. საქართველოში ლუკას ბეგლინგერი მიმდინარე წლის სექტემბრიდან გიუნთერ ბეხლერს ჩაანაცვლებს, რომელიც საქართველოში 2010 წლიდან საქმიანობდა.
