,,ტრანსპორტისა და გზების ასოციაციის" თავმჯდომარის დავით მესხიშვილის განცხადებით, ავტოსაგზაო შემთხვევების რაოდენობა გაიზარდა. მისი თქმით, საქართველოს ხელისუფლებას არ აქვს ტრანსპორტის პოლიტიკა შემუშავებული და საქართველოს გზებზე ერთ თვეში უფრო მეტი ადამიანი კვდება, ვიდრე სტიქიის შედეგად. მან ხელისუფლებას ამ მიმართულებით პრევენციული ღონისძიებების გაატარებისკენ მოუწოდა.
„ბოლო 2 წლის განმავლობში, ავტოსაგზაო შემთხვევები და მასში დაშავებულთა რაოდენობა 30%-ით გაიზარდა. ბავშვთა ტრამვატიზმი და სიკვდილიანობა კი 28%-ით არის გაზრდილი. აღნიშნული მონაცემების საფუძველზე კი, საქართველო ევროპაში „საუკეთესო ხუთეულში“ შედის. მგზავრთა უსაფრთხო გადაადგილებისთვის ხელისფლებისგან მოვითხოვთ, რომ საპატრულო პოლიციამ აღასრულოს კანონით მასზე დაკისრებული მოვალეობა და დარღვევებზე მკაცრი რეაგირება დაიწყოს. ასევე, საპატრულო პოლიციის თანამშრომლები საერთაშორისო ექსპერტების მიერ გადამზადდნენ საგზაო მოძრაობის დარეგულირების სფეროში და უსაფრთხოების საკითხებში; აუცილებელია, გაზზე კუსტარულად გადაყვანილ სამგზავრო მიკროავტობუსებს აეკრძალოთ რეისში გასვლა. მათ შორის, დაუყოვნებლივ შეაჩეროს თბილისის მერიამ ის ყვითელი მოკროავტობუსები, რომელთაც ძრავა შეუცვალეს და კუსტარულად გაზზე გადაიყვანეს; ასევე, მოვითხოვთ, რომ სიჩქარის გადაჭარბებაზე და უწყვეტი ხაზის გადაკვეთაზე სანქციები გამკაცრდეს, ვინაიდან ყოველი მეოთხე ავტომობილი სიჩქარეს აჭარბებს 130 კმ/სთ-ით, რაც სიკვდიალიანობის მთავარი მიზეზია; სავალდებულოა, მიკროავტობუსებისთვის და ავტობუსებისთვის სიჩქარის ჩამწერი ტაქოგრაფების გამოყენება; ასევე, აუცილებელია, რომ ბავშვთა გადაყვანა მოხდეს მხოლოდ და მხოლოდ სპეციალური სავარძლით ან დამჭერი მოწყობილობით; უნდა გათავისუფლდნენ თანამდებობებიდან ეკონომიკის სამინისტროს სახმელეთო ტრანსპორტის სააგენტოს უუნარო და უმოქმედო ხელმძღვანელი პირები, რომელთაც მგზავრთა უსაფრთხო გადაყვანის ურზუნველყოფა ევალებათ და საჭიროა, რომ საგზაო უსაფრთხოების სფეროში შესაბამისი კომპეტენტური და პასუხისმგებელი სამსახური შეიქმნას", - აღნიშნავს დავით მესხიშვილი.