თბილისის მუნიციპალიტეტის საკრებულოს სარევიზიო კომისიის თავმჯდომარე - ნუგზარ მალაღურაძე პროექტის „ბინათმესაკუთრეთა ამხანაგობების საქმიანობის შეფასება და არსებული გამოწვევების ანალიზი“ შედეგების პრეზენტაციას დაესწრო.
ღონისძიებაზე 1487 რესპოდენტის გამოკითხვაზე დაფუძნებული, საქართველოს ხუთ თვითმმართველ ქალაქში ჩატარებული კვლევის შედეგები იყო წარმოდგენილი, რომელთა დროსაც მოხდა თბილისში, ბათუმში, ზუგდიდში, ფოთსა და ოზურგეთში არსებული მრავალბინიანი სახლების ბინათმესაკუთრეთა ამხანაგობების საქმიანობის პროცესში გამოვლენილი პრობლემების შეფასება და არსებული გამოწვევების ანალიზი. გარდა ამისა იმსჯელეს ამხანაგობების საქმიანობის საკანონმდელო რეგულაციებსა და სასამართლო პრაქტიკაზე.
საკრებულოს სარევიზიო კომისიის თავმჯდომარემ, კვლევის ძირითადი შედეგების გაცნობის შემდეგ გამართულ დისკუსიაში მონაწილეობა მიიღო, ბინათმესაკუთრეთა ამხანაგობების საქმიანობა შეაფასა და დამსწრე საზოგადოებას საკითხის შესახებ საკუთარი რეკომენდაციები გააცნო.
პრეზენტაციას საქართველოს საკანონმდებლო ორგანოს წარმომადგენლები და თბილისისა და რეგიონების ბინათმესაკუთრეთა ამხანაგობების თავმჯდომარეები ესწრებოდნენ.
კვლევა „განვითარებისა და დემოკრატიის ცენტრის“ (CDD) მიერ, საქართველოს ინსტიტუციონალური განვითარების ცენტრთან (GIDC) პარტნიორობითა და ფონდი ღია საზოგადოება საქართველოს ფინანსური მხარდაჭერით ჩატარდა.